სახელმწიფო უსაფრთხოების სამსახურის ყოფილი მაღალჩინოსანი, სოსო გოგაშვილი ამბობს, რომ გამორიცხული არაა ქვეყანაში დამნაშავეების შემოსვლას ვერ ვიგებდეთ. ამის შესახებ სუს-ის ყოფილმა მაღალჩინოსანმა TV პირველის ეთერში ისაუბრა.

"მე დაახლოებით აგიხსნის სამსახურის მუშაობის სპეციფიკას, ის, რისი თქმაც შემიძლია. ქვეყანაში მუდმივად ხდება ისეთი ადამიანების შემოსვლა და გასვლა, რომლის იდენტიფიცირებას სრულად, რა თქმა უნდა, ვერ მოვახერხებთ. არ არის გამორიცხული, რომ ქვეყანაში იყვნენ ისეთი ადამიანები ჩამოსულები და წასულები ისე, რომ ვერც ვიგებდეთ და ისინი დამნაშავეები ყოფილიყვნენ", — თქვა სოსო გოგაშვილმა.

სოსო გოგაშვილის განმარტებით, ეს იმიტომ ხდება, რომ მათ თავის შენიღბვის ბევრი მეთოდი აქვთ, მუდმივ მონიტორინგში ის ადამიანები არიან, რომელიც "მიდრეკილია კრიმინალისკენ". მან აღნიშნა, რომ ახმედ ჩატაევი, რომელიც ტერორისტული ორგანიზაციის წევრობასა და ტერორისტული აქტის მოწყობაშია ბრალდებული, საქართველოში იმ გზით შემოვიდა, რომელიც მას წინა ხელისუფლების დროს "კარგად ჰქონდა გატკეპნილი".