მთავარმა პროკურორმა ირაკლი შოთაძემ დემურ სტურუას დედის, ნონა ჯოჯუას დღეს გაკეთებულ განცხადებებს უპასუხა და თქვა, რომ გამოძიების მიმდინარეობისას, დაზარალებული აუცილებლად დაიკითხება იმ ფაქტების ირგვლივ, რაზეც საჯაროდ ისაუბრა. ამის შესახებ პროკურორმა დღეს, 28 ოქტომბერს, ჟურნალისტებთან საუბრისას განაცხადა:

"გამოძიება დასრულებული არ არის, გრძელდება და ჯერ ეს საქმე წინასწარი გამოძიების ეტაპზეა. შესაბამისად აუცილებლად დაიკითხება დაზარალებული მის მიერ დღეს საჯაროდ გაცხადებული ფაქტების ირგვლივ. რაც შეეხება იმ ფაქტს, რომ ეს წერილი არ არის დაწერილი გარდაცვლილის მიერ, მე შემიძლია გითხრათ რომ საქმეზე ჩატარდა ექსპერტიზა რომლითაც უტყუარად დადგენილია რომ იგი დემურ სტურუამ დაწერა".

დემურ სტურუას დედა ნონა ჯოჯუა On.ge-სთან საუბარში ამბობს, რომ მას ღამღამობით სახლში ყოფნისას უცნობი ადამიანები აშინებენ.

ნონა ჯოჯუას თქმით, გამოძიება მის კითხვებს ვერ პასუხობს. მას აინტერესებს, თუ მისი შვილი თვითმკვლელობამდე გოდერძი თევზაძემ მიიყვანა, რატომ არ დგება მისი გამამტყუნებელი განაჩენი.