ტრანსგენდერი ქალი გაბრიელა ჰყვება, რომ ტრანს ადამიანები ქუჩაში თავს ვეღარ იცავენ, პოლიცია კი მათ პროვოცირებას ახდენს. ამაზე გაბრიელამ დღეს, 20 იანვარს თანასწორობის მოძრაობის ოფისში გამართულ პრესკონფერენციაზე ისაუბრა. მან 18 იანვარს ცირკთან მომხდარი ინციდენტი გაიხსენა, რა დროსაც ორი ტრანსგენდერი ქალი და აქტივისტი ნატა ფერაძე დააკავეს.

"პოლიცია ყველანაირად ცდილობს მიგვიყვანოს იმ დონემდე, რომ ცოტა ხმამაღალ ტონზე ვისაუბროთ და თუნდაც შეურაცხყოფა მივაყენოთ. იმის მაგივრად, რომ დაგეხმაროს, პირიქით, აქეთ ცდილობენ პროვოცირება გაგიკეთონ და მერე დაგაკავონ დაუმორჩილებლობაზე. დიდი უსამართლობა ხდება უკვე და ვეღარ ვიცავთ ჩვენს თავს. ვერც დავიცავთ, ჩვენ ძალას არ ვიყენებთ პიროვნებების მიმართ", — აცხადებს ტრანსგენდერი ქალი გაბრიელა.

იგი იხსენებს, რომ 18 იანვარს მოძრაობა სირცხვილიამ მათ გასათბობად შეშა გაუგზავნა. მაშინ როდესაც ნატა ფერაძემ შეშა ადგილზე მიიტანა მანქანით, იქვე არასრულწლოვნები მივიდნენ და დაუწყეს ტრანსგენდერებს შეშის სროლა. გაბრიელას თქმით, მაშინვე გამოიძახეს საპარულო ეკიპაჟი, თუმცა მისი ინფორმაციით, პოლიციამ არასრულწლოვნები განარიდა.

"ხშირას ხდება ასე. ჩვენ არ გვაღიარებს სახელმწიფო, უარყოფს ჩვენს არსებობას... რა მნიშვნელობა აქვს სქესს, ორიენტაციას. კანონი ყველასთვის ერთია და იმის გამო, რომ ჩვენ ვართ ტრანსგენდერები, პოლიციამ გააკეთოს შესაბამისი რეაგირება", — ამბობს გაბრიელა.

ორი დღის წინ სამოქალაქო აქტივისტი, ნატა ფერაძე პოლიციამ დაუმორჩილებლობის მუხლით დააკავა, მოგვიანებით კი ხელწერილით გაუშვა. დაკავების დროს ნატა ფერაძე ფეისბუქის პირდაპირ ეთერში იყო. ერთ-ერთ ვიდეოში ისმის, რომ ნატა ფერაძე ტრანსგენდერ ქალს გამოესარჩლა და ადგილზე მყოფ პატრულს ჰკითხა, თუ რა მუხლით დააკავეს ერთ-ერთი ტრანსგენდერი. მას შემდეგ, რაც სამოქალაქო ფორმიანმა კაცმა მას "დაწყნარებისკენ" მოუწოდა, ნატა ფერაძემ უპასუხა: "კიდევ ერთხელ მეტყვი მაგას და შემოგილაწუნებ". ამის შემდეგ ეკიპაჟმა იგი პატრულის მანქანით წაიყვანა.