ქუთათელ-გაენათელმა მიტროპოლიტმა იოანემ ჟურნალისტებს ჰკითხა, დეკანოზ გიორგი მამალაძის შეწყალების თხოვნით თვითონ რატომ არ მიმართავენ პრეზიდენტს. ამის შესახებ მან მას შემდეგ განაცხადა, რაც ჟურნალისტებმა ჰკითხეს, აპირებს თუ არა სინოდი პრეზიდენტს მეორედ მიმართოს.

"რა უცნაური ხალხი ხართ. თქვენ რატომ არ მიმართავთ, მედია? თქვენ ხომ მეხუთე ძალაუფლება ხართ... თქვენ მედიამ მიმართეთ... ჩვენ არ მოგვითხოვია მისი დაკავება, გასაგებია ხო? როცა დადგება ჟამი და მას [პრეზიდენტს] შეეძლება ჩვენი სიტყვის მიღება, ალბათ, ის შეასრულებს ალბათ. მე არ ვისურვებ არც ერთის ყოფნას ციხეში", — განაცხადა მიტროპოლიტმა.

6 იანვარს ცნობილი გახდა, რომ პრეზიდენტმა არ შეიწყალა გიორგი მამალაძე. დეკანოზ მამალაძის შეწყალების შუამდგომლობით პრეზიდენტს სინოდმა თითქმის ორი წლის შემდეგ, ოქტომბერში მიმართა.

გიორგი მამალაძის გათავისუფლების მოთხოვნით მის ძმას, თორნიკეს მამალაძეს სექტემბრიდან პარლამენტის წინ კარავი ჰქონდა გაშლილი.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.