თბილისის საკრებულოს დეპუტატი ერეკლე კუხიანიძე, რომელიც მმართველმა გუნდმა უკანონო ტყვეობაში მყოფი ექიმისა და მისი ოჯახის შეურაცხმყოფის შემდეგ პარტიიდან გარიცხა, ვაჟა გაფრინდაშვილის დისკრედიტაციას აგრძელებს. ის აცხადებს, რომ გაფრინდაშვილი "უცნაურ რაღაცეებს" ლაპარაკობს და მასთან შეხვედრა და რჩევის მიცემა სურს.

"მე მინდოდა მასთან შეხვედრა იმიტომ, რომ მქონდა გარკვეული მოსაზრებები. ვიცი, რომ ეს ადამიანი ცოტა ხნის შემდეგ, როცა ეიფორია დამთავრდება, ძალიან მძიმე მდგომარეობაში ჩავარდება...

ეს ეიფორია გაივლის და ყველა მიხვდება, რომ გმირი არ არის და არის ადამიანი, რომელმაც გამოიჩინა ძალიან დიდი სისუსტე", — განაცხადა მან კვირას პრესკლუბში გამართულ ბრიფინგზე.

გაფრინდაშვილის უკანონო პატიმრობაში ყოფნის პერიოდში საკრებულოს ოცნების დეპუტატმა, ერეკლე კუხიანიძემ ექიმის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის.ქართული ოცნების გადაწყვეტილებით, ერეკლე კუხიანიძე თბილისის საკრებულოს უმრავლესობიდან 18 დეკემბერს გარიცხეს.

28 დეკემბერს 48-დღიანი უკანონო პატიმრობის შემდეგ ვაჟა გაფრინდაშვილი საოკუპაციო ძალებმა გაათავისუფლეს. "არ მაინტერესებს", — ასე უპასუხა ექიმმა კითხვას, კუხიანიძის ქცევის შესახებ.