ფრაქცია ქართული ოცნების თავმჯდომარე, მამუკა მდინარაძე ნინო წილოსანს ეთანხმება და ფიქრობს, რომ Human Right Watch-ის დასკვნა კრიტიკული იმის გამოა, რომ მათ მიხეილ სააკაშვილის "აღიარებაზე" წარმოდგენა არ ჰქონდათ.

"წარმოდგენაც კი არ შეეძლებოდა, თუ ორი დღით ადრე, ვიდრე ეს დასკვნა გამოქვეყნდებოდა, საქართველოს ყოფილი პრეზიდენტი, მიხეილ სააკაშვილი პირდაპირ ეთერში აღიარებდა ხელისუფლების დამხობის მცდელობას. ეს ერთი და მეორე, მე მგონია, რომ საერთაშორისო ორგანიზაციებს კრიტიკულად მომავალში მოუწევთ თავიანთი წყაროების კარგად გადამოწმება იმიტომ, რომ ისეთ უხერხულ მდგომარეობაში არ ჩავარდნენ, რა მდგომარეობაშიც ვარდებიან", — თქვა მამუკა მდინარაძემ

გარემოს დაცვის კომიტეტის თავმჯდომარემ, ნინო წილოსანმა თქვა, რომ The Human Right Watch-ის ანგარიში იმიტომაა კრიტიკული, რომ მანამ მომზადდა, სანამ მიხეილ სააკაშვილი 20 ივნისის მოვლენებზე "აღიარებით ჩვენებას" გააკეთებდა. მისი თქმით, ამ კომენტარმა ყველაფერს "ნათელი მოჰფინა".

შინაგან საქმეთა სამინისტრომ 20 ივნისის მოვლენებზე საქართველოს ყოფილი პრეზიდენტის, მიხეილ სააკაშვილის განცხადებასთან დაკავშირებით გამოძიება დაიწყო. მათი თქმით, სააკაშვილის რიტორიკა ხელისუფლების დამხობის მცდელობაზე მიუთითებს.

საერთაშორისო უფლებადამცველმა ორგანიზაციამ, The Human Right Watch-მა, რომელიც მსოფლიოს ასამდე ქვეყნებში არსებულ ვითარებას აანალიზებს, ყოველწლიური ანგარიში გამოაქვეყნა. 2019 წელს საქართველოს შესახებ ანგარიშში ყურადღება გამახვილდა სამართალდამცავთა დაუსჯელობაზე, პოლიტიკური დაძაბულობაზე, შრომის კანონმდებლობის არასაკმარის რეგულაციებსა და მკაცრ ნარკოპოლიტიკაზე.

Human Right Watch წერს, რომ უფლებამოსილების ბოროტად გამოყენების შემთხვევებზე სამართალდამცავთა დაუსჯელობა ქვეყნისთვის ისევ გადაუჭრელი პრობლემაა. მათი თქმით, დაფინანსების არქონის მიზეზით ხელისუფლებამ ორჯერ გადადო სახელმწიფო ინსპექტორის სამსახურის ამოქმედება, რომელიც 2018 წელს შეიქმნა და მუშაობა 2019 წლის პირველ ნოემბერს დაიწყო.