სულ ცოტა ხნის წინ ამერიკის კინოაკადემიამ ოსკარის 92-ე დაჯილდოების ნომინანტები დაასახელა.

სულ 24 ნომინაციაში გამოვლენილ წლევანდელ ფავორიტ ფილმებს, მსახიობებსა და რეჟისორებს შორის თვალშისაცემი იყო რამდენიმე სავარაუდო კანდიდატი, რომელთა წარდგენასაც ბევრი ელოდება, მაგრამ მათ ნომინაცია ვერ დაიმსახურეს.

მაგალითად, აკვაფინა, რომელსაც ფილმ The Farewell-ში ქალის როლის საუკეთესოდ შესრულებისთვის ოქროს გლობუსი გადაეცა, ოსკარის ფინალისტებს შორის ვერ მოხვდა. ასევე აღსანიშნავია, რომ მიუხედავად საუკეთესო ფილმისა და ადაპტირებული სცენარის ნომინაციებში Little Women-ის წარდგენისა, მისი რეჟისორი, გრეტა გერვიგი რეჟისორის ნომინაციაში არ წარადგინეს, რის გამოც ამერიკის კინოაკადემია კიდევ ერთხელ გააკრიტიკეს ქალი რეჟისორების არშემჩნევის გამო.

გრეტა გერვიგი Little Women-ის გადასაღებ მოედანზე.

ფოტო: Wilson Webb

იმ კინოხელოვანებთან ერთად, რომელთა ნამუშევრებიც ნაკლებად ან საერთოდ არ შეიმჩნიეს, არიან ისეთებიც, რომლებიც წლევანდელი დაჯილდოების უპირობო ლიდერები გახდნენ ნომინაციების რაოდენობით: ტოდ ფილიპსის Joker-მა ყველაზე მეტი, 11 ნომინაცია მიიღო, მათ შორის საუკეთესო ფილმის, საუკეთესო რეჟისორისა და კაცის როლის საუკეთესოდ შესრულებისათვის.

ეს პირველი შემთხვევაა, როცა კომიქსის მიხედვით გადაღებულმა ფილმმა ამდენი ნომინაცია დაიმსახურა.

Joker

ფოტო: WARNER BROS.

ტოდ ფილიპსის გახმაურებული ფილმის შემდეგ 10-10 ნომინაცია დაიმსახურეს კვენტინ ტარანტინოს Once Upon a Time in Hollywood-მა, მარტინ სკორსეზეს The Irishman-მა და სემ მენდესის 1917-მა. ეს უკანასკნელი ოქროს გლობუსზე წლის საუკეთესო ფილმად დასახელდა.

The Irishman

ფოტო: Netflix

წლევანდელ ფინალისტებს შორის ერთ-ერთი ფავორიტი აღმოჩნდა არაამერიკული კინოს წარმომადგენელი — ბონგ ჯუნ ჰოს Parasite, რომელმაც 6 ნომინაცია დაიმსახურა, მათ შორის საუკეთესო ფილმის, სცენარისა და რეჟისორის კატეგორიაში და ამით პირველი სამხრეთ კორეული ფილმი გახდა, რომელმაც ამ შედეგს მიაღწია.

უცხოენოვანი ფილმები ჰოლივუდურ კინოდაჯილდოებაზე მსგავს წარმატებას იშვიათად აღწევენ, თუმცა Parasite-ს კრიტიკოსების ნაწილი არა მარტო უცხოენოვანი ფილმის ნომინაციაში გამარჯვებას, არამედ წლის საუკეთესო კინოსურათად დასახელებასაც უწინასწარმეტყველებენ.

Parasite

ფოტო: CJ Entertainment

ასევე აღსანიშნავია, რომ ოსკარის ნომინანტებს შორის პირველად მოხვდა მსახიობი სკარლეტ იოჰანსონი, რომელსაც მანამდე ამერიკის კინოაკადემია არ იმჩნევდა. წელს კი ერთდროულად წარადგინეს ორ ნომინაციაში: მთავარი როლის შესრულებისთვის ფილმ Marriage Story-ში და მეორეხარისხოვანი როლის შესრულებისთვის Jojo Rabbit-ში.

ოსკარების 2020 წლის დაჯილდოების ცერემონია 10 თებერვალს გაიმართება.

ასევე იხილეთ: