აფხაზეთის დე ფაქტო უშიშროების საბჭოს თავმჯდომარე მუჰამედ კილბა ამბობს, რომ ოპოზიციონერებმა დე ფაქტო პრეზიდენტის ადმინიტრაციაში, იარაღის საცავიდან იარაღი წაიღეს.

"ყველა კაბინეტი გახსნილია, სახელმწიფო სიმბოლოები მოპარულია, გარდა ამისა, გახსნილია იარაღის საცავი და იარაღის გარკვეული რაოდენობა მომიტინგეებს აქვთ. მოლაპარაკებები მიმდინარეობს, ხუთი უკვე დაბრუნებულია, თუმცა გაცილებით უფრო მეტია", — განაცხადა კილბამ.

მუჰამედ კილბამ აღნიშნა, რომ მათთვის არსებული ინფორმაციის თანახმად, შენობაში 250-300 ადამიანი იმყოფება.

9 იანვარს აფხაზეთის დე ფაქტო პარლამენტმა მიიღო გადაწყვეტილება, რომლითაც დე ფაქტო პრეზიდენტ რაულ ხაჯიმბას გადადგომისკენ მოუწოდეს. ეხო კავკაზას ინფორმაციით, დე ფაქტო პარლამენტმა გადაწყვეტილება დესტაბილიზაციის თავიდან არიდების მოტივით განმარტა.

ოკუპირებულ სოხუმში მოქალაქეები დე ფაქტო პრეზიდენტის ადმინისტრაციაში შეღწევას ცდილობდნენ. როგორც ეხო კავკაზა წერდა, ადმინისტრაციასთან ოპოზიცია საპროტესტო აქციას მართავდა. შენობასთან სამართალდამცავები იყვნენ მობილიზებული და დემონსტრანტების შეკავებას ცდილობდნენ. აქციის მონაწილეებმა შენობის პირველი სართულის ფანჯრები და კარები შეამტვრიეს.

პროტესტი უკავშირდება პრეზიდენტობის ყოფილი კანდიდატის, ალხას კვიცინიას სარჩელს, რომელიც ითხოვს, რომ აფხაზეთის საპრეზიდენტო არჩევნების შედეგები გაუქმდეს.

თვითონ რაულ ხაჯიმბა მხარეებს მოლაპარაკებებისკენ მოუწოდებს. რუსეთი მის მიერვე ოკუპირებულ აფხაზეთში განვითარებულ მოვლენებზე ამბობს, რომ ეს "ქვეყნის შიდა საქმეა".

სოხუმში მიმდინარე მოვლენებს გამოეხმაურა პრეზიდენტი სალომე ზურაბიშვილიც. მან განაცხადა, რომ ის აკვირდება აფხაზეთში მიმდინარე მოვლენებს:

"დიდი ყურადღებით ვაკვირდები სოხუმში განვითარებულ მოვლენებს და ოკუპირებულ აფხაზეთში ჩვენი მოქალაქეების უსაფრთხოებას, ბედსა და მათი უფლებების დაცვას".