ანაკლიის განვითარების კონსორციუმის გენერალური დირექტორის, ლევან ახვლედიანის განცხადებით, მთავრობის მხრიდან მცირე დათმობები იყო საჭირო, რომ პროექტი განხორციელებულიყო. ასე გამოეხმაურა ის სპეციალურად ჩანიშნულ ბრიფინგზე მთავრობის გადაწყვეტილებას ანაკლიის პორტის შეჩერების უფლების ჩამორთმევაზე.

"მთავრობას აქ უნდა მიეღო მოწინავე როლი, ძალიან ცოტა იყო დარჩენილი, რომ შეთანხმება შემდგარიყო და პროექტი წარმატებით განხორციელებულიყო. მათი ამ მოქმედებებით დაზიანდა პროექტი და კონსორციუმი. ამ რთულ ვითარებაში ჩვენ დავაინტერესეთ ინვესტორები, რომლებიც ითხოვდნენ მთავრობისგან შექმნილიყო კომფორტი იმ ინვესტიციების თაობაზე, რომლის განხორციელებასაც ანაკლიის კონსორციუმში გეგმავდნენ, რაც ვერ მოხერხდა მთავრობის მხრიდან", — აღნიშნავს ლევან ახვლედიანი

კონსორციუმის გენერალური დირექტორის თქმით, მთავრობა ძირითადი საკითხების მოგვარებაზე კონსტრუქციულ საუბარში არ შედიოდა. ახვლედიანის განცხადებით, ანაკლიის პორტის მშენებლობა მთავრობის უმოქმედობით დაზიანდა.

"2018 წელს ის ბრალდებები, რომელიც ჩვენი მთავარი სპონსორების მიმართ იყო ძალიან დააზიანა ბანკებისა და ინვესტორების მოძიების პროცესი. ასევე, მთავრობის მხრიდან კონკრეტულ ინვესტორებს ეთქვათ, რომ არ შემოსულიყვნენ პროექტში", — განაცხადა ლევან ახვლედიანმა.

საქართველოს მთავრობა ღრმაწყლოვანი პორტის მშენებლობასთან დაკავშირებით ანაკლიის კონსორციუმთან ხელშეკრულებას წყვეტს. ამის შესახევბ ინფრასტრუქტურის მინისტრმა, მაია ცქიტიშვილმა, 9 იანვარს, მთავრობის სხდომის დასრულების შემდეგ ისაუბრა. მიზეზად კონსორციუმის მხრიდან ხელშეკრულებით ნაკისრი ვალდებულებების შეუსრულებლობა დაასახელა და აღნიშნა, რომ მთავრობა ახალი პარტნიორის მოძიებას დაიწყებს.

გაიგეთ მეტი: