ირანი უარს აცხადებს, ჩამოვარდნილი უკრაინული ავიახაზების თვითმფრინავის შავი ყუთი უკრაინას გადასცეს. ამის შესახებ Unian ირანის სამოქალაქო ავიაციის ხელმძღვანელის, ალი აბეზადეს განცხადებაზე დაყრდნობით წერს.

Reuters-ის ინფორმაციით, აბეზადემ განაცხადა, რომ ირანს ჯერ არ გადაუწყვეტია, რომელ ქვეყანას გადასცემს შავ ყუთს გასაშიფრად. CNN კი წერს, რომ აბეზადის თქმით, ყუთს ირანშივე გაშიფრავენ, რაშიც უკრაინელი გამომძიებლებიც იქნებიან ჩართული. მისივე თქმით, შავ ყუთს არ გადასცემენ ამერიკას ან თვითმფრინავების მწარმოებელ კომპანიას.

დღეს, 8 იანვარს ირანში უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები არიან. მათ შორის ირანის — 82, კანადის — 63, უკრაინის — 11, შვეიცარიის — 10, ავღანეთის — 4, გერმანიის — 3 და დიდი ბრიტანეთის — 3 მოქალაქე. უკრაინის 11 მოქალაქეს შორის 2 მგზავრი იყო, 9 კი ეკიპაჟის წევრი.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.