უკვე ორი დღეა, თბილისის ათასობით მოსახლის ონკანში წყალი არ მოდის. 23 ოქტომბრის მერე უბნებში, სადაც წყლის მიწოდება შეწყდა, ჯორჯიან ვოთერ ენდ ფაუერმა არაერთხელ შეცვალა წყლის მოსვლის დრო, თუმცა, წყალი მოსახლეობას ჯერ კიდევ არ მიეწოდება.

როგორც ჯორჯიან ვოთერ ენდ ფაუერი აცხადებს, ამის მიზეზი გახდა სოფელ დიღომში, საქალაქო სასამართლოს მიმდებარე ტერიტორიაზე, მაღალი ძაბვის არეალში მაგისტრალური წყალსადენის დაზიანება.

კომპანიის განცხადებით, დაზიანების შედეგად წყალი არ ექნებათ შემდეგ დასახლებებს:

  • დიდ დიღომს და მიმდებარე კერძო დასახლებებს: ქოშიგორას, სოფელზურგოვანს, ამერიკის საელჩოს დასახლებას, მუხათგვერდის დასახლებას, ფერაძის (სასოფლოს დასახლება) და ხელაშვილის ქუჩებს, ბენდუქიძის დასახლებას.
  • სოფელ დიღომში: სონღულაშვილის, უგრეხელიძის ქუჩებს, ტოიოტას მიმდებარე ახალ დასახლებას, საქალაქო სასამართლოსა და მიმდებარე დასახლებას.
  • ვაშლიჯვრის კერძო დასახლებას: სარაჯიშვილის, კვანტალიანისა და გოძიაშვილის ქუჩებს თავისშესახვევებით.
  • დიღმისმასივში: 1კვარტლის #10, #11, #12 კორპუსებს.
  • სოფლის მეურნეობის სამინისტროსა და მიმდებარე დასახლებას, იასამნის, ბროწეულის და ბაქრაძის ქუჩებს.
  • ზაჰესში: გრ. ხანძთელის, სხვიტორის, კასკადის ქუჩებს.
  • ზემო ვეძისის ნაწილს, გოთუას ქუჩას და თამარაშვილის ქუჩის ნაწილს.

როგორც ჯორჯიან ვოთერ ენდ ფაუერი აცხადებს, წყალმომარაგება აღნიშნულ უბნებს შეუწყდებათ 25 ოქტომბრის დილის 8 საათიდან 26 ოქტომბრის დილის 10:00 საათამდე.

თუმცა, დასახლებების დიდ ნაწილს, რომელიც GWP-ს განცხადებაშია ჩამოთვლილი, წყალი 23 ოქტომბრიდან არ მიეწოდება. წყალი მხოლოდ რამდენიმე საათით, 25 ოქტომბერს, შუაღამისას ჩაურთეს მოსახლეობას და გამთენიისას უკვე გათიშული იყო.

როგორც კომპანია ამტკიცებს, ტექნიკურ-აღდგენითი სამუშაოების წარმოება უსაფრთხოების მაღალი ზომების დაცვას მოითხოვს, რაც სამუშაო პროცესს ართულებს.

23 ოტომბერს ჯორჯიან ვოთერ ენდ ფაუერმა წყლის მიწოდება ასევე დაზიანების მოტივით შეუზღუდა ვაკე-საბურთალოსა და მთაწმინდის მოსახლეობის ნაწილს, წყნეთის, კიკეთის, კოჯრის, წავკისის, ტაბახმელასა და შინდისის მოსახლეობას.

როგორც კომპანია ამბობს, მათ მოსახლეობა წყლის შეწყვეტის შესახებ წინასწარ, მოკლე ტექსტური შეტყობინებით გააფრთხილეს, თუმცა, მოქალაქეების ნაწილმა 23 ოქტომბერს გამაფრთხილებელი შეტყობინება წყლის გათიშვიდან რამდენიმე საათის შემდეგ მიიღო.