რამდენიმე წუთის წინ რუსთავში 112-ის ახალი შენობა გაიხსნა. გახსნის ღონისძიებაზე სიტყვით გამოვიდნენ შსს მინისტრი, გიორგი მღებრიშვილი და პრემიერმინისტრი, გიორგი კვირიკაშვილი.

როგორც შინაგან საქმეთა მინისტრმა, გიორგი მღებრიშვილმა განაცხადა, ახალი ცენტრის გახსნა კიდევ ერთი ნაბიჯია ჩვენი ქვეყნის უსაფრთხოების დაცვისთვის:

"შსს-ს პრიორიტეტი ტექნოლოგიური გარდაქმნის გზით სისტემის არსებითი რეფორმირებაა. ამ მიზნით, უკვე გავხსენით ერთობლივი ოპერაციების ცენტრი, რომელიც საგრძნობლად გააუმჯობესებს ქვეყნის უსაფრთხოების სისტემას. იმისთვის, რომ ნებისმიერ გამოწვევაზე, სახელმწიფოს რეაგირების სტანდარტი იყოს უფრო მაღალი, დღეს ამ ახალ შენობაში, რუსთავში, მუშაობას იწყებს გადაუდებელი დახმარების ოპერატიული მართვის ალტერნატიული ცენტრი"

როგორც გიორგი კვირიკაშვილმა აღნიშნა, ცენტრის გამართული ფუნქციონირება ქვეყნის მოსახლების უსაფრთხოებისთვის აუცილებელია:

"ეს ცენტრი უწყვეტ რეჟიმში უზრუნველყოფს მთელი ქვეყნის მასშტაბით ჩვენი მოქალაქეების ოპერატიულ მომსახურებას. მოგეხსენებათ, რომ 112 სტრატეგიული მნიშვნელობის ობიექტია და მისი გამართული და უწყვეტი ფუნქციონირება უაღრესად მნიშვნელოვანია სახელმწიფოსთვის და ჩვენი ქვეყნის მოსახლების უსაფრთხოებისთვის. დარწმუნებული ვარ, რომ ორივე ცენტრის პარალელური გამართული მუშაობა კიდევ უფრო ეფექტიანი იქნება".