ქართული ოცნების ოფისში ლიდერების შეკრების დასრულების შემდეგ, შეხვედრიდან გამოსულმა გედევან ფოფხაძემ ჟურნალისტებთან კომენტარი გააკეთა. შეხვედრა დღეს, 24 ოქტომბერს გაიმართა. მისი თქმით, არჩევნების მეორე ტურის შემდეგ გადაწყდება მმართველი პარტიის კონკრეტული გადაწყვეტილებები:

"ჯერ უნდა დამთავრდეს არჩევნების მეორე ტური და მერე უნდა ვიფიქროთ, შემდეგ რა ნაბიჯებს გადავდგამთ. პირველ რიგში უნდა ჩამოყალიბდეს საპარლამენტო უმრავლესობა და ორგანიზაციულად განისაზღვროს მისი როლები. მხოლოდ ამის შემდეგ იქნება კონკრეტიკაზე საუბარი".

პარტიის ლიდერების განცხადებით, მათი შეხვედრის მთავარი თემა არჩევნების მეორე ტურის ორგანიზება იყო და სხვა თუნდაც თანამდებობების საკითხი არ განუხილავთ. შეხვედრას არ ესწრებოდა პრემიერი გიორგი კვირიკაშვილი.