ოსკარის ნომინანტობის კანდიდატად საქართველოდან გაგზავნილი ფილმი სხვისი სახლი ანტალიის საერთაშორისო კინოფესტივალის რჩეული გახდა.

ჟიურის გადაწყვეტილება სცენიდან ენდი მაკდაუელმა გამოაცხადა, რის შემდეგაც რუსუდან გლურჯიძის ფილმს მორიგი საერთაშორისო ჯილდო - ჟიურის სპეციალური პრიზი გადაეცა.

ფოტო: Expo 2016 Antalya Kongre Sergi Salonu.

სხვისი სახლი ეროვნული კინოცენტრის კონკურსის გამარჯვებული პროექტია და ის საქართველოს, რუსეთის, საფრანგეთის და ხორვატიის კოპროდუქციაა. ფილმი გამანადგურებელ ომში ფიზიკურად გადარჩენილი ორი ოჯახის შესახებ მოგვითხრობს, რომლებიც ნაჩქარევად გამოთავისუფლებულ სახლებს იკავებენ, მაგრამ მშვიდობიან გარემოში ახალი ცხოვრების დაწყება არ შეუძლიათ და ომი მათ ყოველდღიურ ცხოვრებაშიც გრძელდება.

ანტალიის საერთაშორისო კინოფესტივალი თურქეთში ყველაზე მნიშვნელოვანი და მასშტაბური კინომოვლენაა, რომელიც 1963 წლიდან იმართება.

გარდა ამისა, მექსიკაში ჩატარებული კონკურსის ჟიურის რჩეული გახდა კიდევ ერთი ქართული ფილმი - როცა დედამიწა მსუბუქია.

სალომე მაჩაიძის, თამუნა ქარუმიძისა და დავით მესხის დოკუმენტური ფილმი კინოფესტივალზე DocsMX ჟიურის სპეციალური პრიზით სექციაში Around The Cities დააჯილდოვეს.

როცა დედამიწა მსუბუქია თანამედროვე ახალგაზრდებზე მოგვითხრობს.

დოკუმენტური ფილმების საერთაშორისო ფესტივალი DocsMX მექსიკაში წელს უკვე მე-11-დ გაიმართა და რამდენიმე სექციაში 90-ზე მეტი ფილმის ჩვენებას უმასპინძლა.