რთულია ისეთი ადამიანის პოვნა, რომელიც ამერიკულ ტელესერიალებს არ უყურებს. ე.წ. ტელევიზიის ოქროს ხანამ იმდენი ქნა, რომ თითქმის მთელი მსოფლიო მიაჯაჭვა ტელევიზორის ან კომპიუტერის ეკრანებს.

სერიალების პროდაქშენზე ასობით მილიონი დოლარი იხარჯება და რამდენიმე მათგანი ისეთ მასშტაბებზეა გასული, რომ ჰოლივუდს არც კი დაესიზმრება.

გარდა პროდაქშენისა და სხვა ელემენტებისა, ცხადია, დიდი როლი აკისრია მუსიკას, რომელიც სერიალებში, ისევე როგორც ფილმებში, ატმოსფეროს ქმნის და მაყურებელს კიდევ უფრო ჩართულს ხდის. წარმოგიდგენთ 8, ჩემი აზრით, საუკეთესო საუნდტრეკს სერიალებიდან:

1. Lost - Michael Giacchino

ამერიკული ტელესერიალების აღმასვლა დაკარგულებამდე ბევრად ადრე დაიწყო, მაგრამ ჯეი ჯეი აბრამსის სერიალი სულ სხვა დონეს სთავაზობდა მაყურებელს. Lost-მა გზა ძალიან ბევრ პროექტს გაუხსნა და ტელეპროდიუსერებს, არხებისა და სტუდიების ხელმძღვანელებს აჩვენა, რომ ტელევიზიას განუსაზღვრელი შესაძლებლობა აქვს. ეს დრამა პირველ რიგში ადამიანებზეა და არა კუნძულზე. სერიები სავსეა ემოციური მომენტებით, რომლებშიც ხშირად ჩანს პერსონაჟთა მორალური დილემები და ამ დილემების შედეგად განვითარებული თვისებები. რა თქმა უნდა, ეს ყველაფერი ნაკლებად ემოციური იქნებოდა მაიკლ ჯიაკინოს გენიალური მუსიკის გარეშე.

2. The Leftovers - Max Richter

არ მომერიდება და ვიტყვი, რომ Six Feet Under-ის შემდეგ ასეთი ძლიერი დრამა ტელევიზიას არ ღირსებია. აქაც იმავეს ვიტყვი: ამ სერიალში მთავარი არ არის მითოლოგია - ანუ ის, რომ ერთ დღეს დედამიწაზე 144 მილიონი ადამიანი უკვალოდ გაქრა (ეს სპოილერი არ არის, იმიტომ რომ სერიალი ამ ამბით იწყება). The Leftovers მოგვითხრობს ადამიანებზე, რომლებიც ებრძვიან მარტოობას, ამოუხსნელ ბუნებრივ მოვლენებს, თუნდაც სიკვდილს. მათ არ იციან, ღმერთს მართლა საუკეთესოები უნდა თავისთვის, თუ უბრალოდ ყველანი შემთხვევითობის პრინციპით მივდივართ იმქვეყნად. აქ ნახავთ ადამიანებს, რომლებიც კარგავენ თავს, იჭედებიან ეგზისტენციალურ ჩიხში. შოუს ყოველი სერია სავსეა ემოციებით, რომელიც აუცილებლად გადმოგედებათ, თქვენც დაიძაბებით, თქვენც ინერვიულებთ, გაბრაზდებით, დასევდიანდებით და სერიის დასასრულს ისევე მოგეშვებათ გულზე, როგორც პერსონაჟებს. ამ ყველაფერს კი იდეალურად ერწყმის მაქს რიხტერის გენიალური მუსიკა.

3. Game of Thrones - Ramin Djiwadi

მოდით, შევთანხმდეთ, რომ ეს სერიალი რამინ ჯივადის მუსიკის გარეშე ისეთი ეპიკური ვერ იქნებოდა, როგორიც ახლა არის. ყოველი სახლის, რეგიონის, მოვლენისა და პერსონაჟის ამოცნობა შეიძლება მუსიკით. ყველაფერს რომ თავი დავანებოთ, ამ ადამიანმა შექმნა Rains of Castamere-ის მუსიკა, რომელიც ზუსტად გამოხატავს ლანისტერების ხასიათს.

4. Transparent - Dustin O'Halloran

კიდევ ერთი ოჯახური დრამა, რომელიც ლოს ანჯელესში მცხოვრები ოჯახის შესახებ მოგვითხრობს. 70 წელს მიღწეული სამი შვილის მამა, მორტ პფეფერმანი, ბოლოს და ბოლოს გადაწყვეტს, რომ თავისი იდენტობა აღარ უნდა დამალოს და თავის ოჯახს და დანარჩენ სამყაროს გაუმხელს, რომ ტრანსგენდერი ქალია. სერიალი სხვადასხვა სიმღერებითაა გაფორმებული, მაგრამ ქუდის მუსიკა, ერთ-ერთი საუკეთესოა სერიალების საუნდტრეკებს შორის.

5. Fargo - Jeff Russo

კოენების საუკეთესო ტრადიციებში შესრულებული, შავი იუმორითა და სატირით გაჯერებული სერიალი, რომელიც სხვა მუსიკით უბრალოდ წარმოუდგენელია. ხანდახან ჯეფ რუსის მიერ შექმნილ გენიალურ მუსიკაში ფილმ ფარგოს ორიგინალურ საუნდტრეკსაც მოჰკრავთ ყურს, რომელიც სერიალს თავის წინაპართან აახლოებს.

6. Sherlock - David Arnold, Michael Price

ეს მუსიკა ერთდროულად ეპიკურიც არის და შერლოკისთვის შესაფერისი ცელქი ხასიათიც აქვს.

7. ჩემი ცოლის დაქალები - ნიკა ჩოხელი

ნიკა ჩოხელი ბოლო წლების ერთ-ერთი საუკეთესო და ნიჭიერი ქართველი კომპოზიტორია, რომელიც სერიალის საუნდტრეკს ამ ჟანრის საუკეთესო ტრადიციების დაცვით ქმნის. ჩემი ცოლის დაქალებისთვის შექმნილი მისი მუსიკა ძირითადი თემის ელემენტებს ყოველთვის შეიცავს, ხოლო რამდენიმე პერსონაჟს საკუთარი "თემაც" კი აქვს.

8. Stranger Things - Kyle Dixon, Michael Stein

თუ ისე მოხდა, რომ ამ სერიალზე ჯერ არაფერი გსმენიათ, მაშინ ჩვენი დაწერილი უამრავი სტატია შეგიძლიათ წაიკითხოთ - აქედან დაიწყეთ: გადადეთ ყველა საქმე და უყურეთ ახალ სერიალს — Stranger Things. რაც შეეხება საუნდტრეკს, ის საუკეთესოდ პასუხობს სერიალის თემასა და ატმოსფეროს: 80-იანი წლების პატარა ქალაქსა და ამოუხსნელ ამბებს, რომლებიც ამ ქალაქში ვითარდება. მელოდია რამდენადაც დაძაბულია, იმდენად სასიამოვნო მოსასმენია.