სპეციალური პენიტენციური სამსახური აცხადებს, რომ 15 წლის ლუკას საქმეზე დაკავებული გამომძიებლის, მარიანა ჩოლოიანის საპატიმრო დაწესებულებაში გადაყვანისას მასზე ხელბორკილების დადების აუცილებლობა არ არსებობდა. ასე ეხმაურება უწყება მედიებში გავრცელებულ კადრებს, სადაც ჩანს, რომ ჩოლოიანი, რომელის ადვოკატიც ამტკიცებდა, რომ მას მოძრაობა არ შეუძლია, თავად გადაადგილდება და ბორკილების გარეშე ჯდება მანქანაში.

უწყების განმარტებით, ხელბორკილი გამოიყენება იმ ბრალდებულის/მსჯავრდებულის მიმართ, რომელიც წინააღმდეგობას უწევს ან არ ემორჩილება სპეციალური პენიტენციური სამსახურის მოსამსახურეს ან/და საფრთხეს უქმნის საკუთარ ან/და სხვის სიცოცხლესა და ჯანმრთელობას. გარდა ამისა, მათი განცხადებით, ქალთა მიმართ ბადრაგირებისას განსაკუთრებული ყურადღება უნდა მიექცეს მათ მოთხოვნილებებს, ფიზიკურ, სოციალურ და ფსიქოლოგიურ საჭიროებებს, მათ შორის, სატრანსპორტო საშუალების ტიპის შერჩევას, კონტროლის მეთოდებსა და ხელბორკილების გამოყენებას.

უწყებაში ამბობენ, რომ ჩოლოიანის ჯანმრთელობის მდგომარეობიდან გამომდინარე, არ არსებობდა არანაირი საფუძველი, რომ გამოყენებული ყოფილიყო ხელბორკილები. რაც შეეხება მისი ჯანმრთელობის მდგომარეობას, უწყებაში ამბობენ, რომ კლინიკის რეკომენდაციებით მას სჭირდება: ფსიქიატრის მუდმივი მეთვალყურეობა და კონსულტაცია 5 დღეში ერთხელ.

მარიანა ჩოლოიანს ბრალი წარდგენილი აქვს 15 წლის მოზარდის გარდაცვალების საქმეზე, რომელიც დაკითხვის შემდეგ მეცხრე სართულიდან გადმოხტა. გენერალური პროკურატურა მას მოზარდისადმი იძულებითი ჩვენების მიცემას ედავება.

დაკავებისას ჩოლოიანი შეუძლოდ გახდა და ის საავადმყოფოში გადაიყვანეს. ადვოკატი ამტკიცებდა, რომ მას მოძრაობა და მეტყველება არ შეუძლია. აქედან გამომდინარე მისი სასამართლო პროცესი საავადმყოფოში გაიმართა. მას აღკვეთი ღონისძიების სახით პატიმრობა შეუფარდეს.

სწორედ საავადმყოფოს დატოვების შემდეგ, საპატიმრო დაწესებულებაში გადაყვანისას გადაღებულ კადრებში ჩანს, რომ ის სხვისი დახმარების გარეშე გააადგილდება.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, არიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.