ექიმი არჩილ ჯვარშეიშვილი აცხადებს, რომ პირველი პრეზიდენტის შვილის, ცოტნე გამსახურდიას ოპერაციამ წარმატებით ჩატარების მიუხედავად, მისი მდგომარეობა მძიმეა.

"ჰემატომები ამოღებულია, დეკომპლექცია გაკეთებულია. ტვინის მდგომარეობა ოპერაციის ბოლოს დამაკმაყოფილებელია. პაციენტი გადაყვანილია რეანიმაციაში ხელოვნურ სუნთქვაზე", — განაცხადა გამსახურდიას ექიმმა.

გარდა ამისა, ის არ გამორიცხავს, რომ პაციენტს კიდევ ერთი ოპერაცია დასჭირდეს.

20 დეკემბერს გვიან ღამით ცოტნე გამსახურდიას მეორე, ნეიროქირურგიული ოპერაცია ჩაუტარდა. კონსტანტინე გამსახურდია ფეისბუქზე წერდა, რომ მის ძმას ქალა-სარქვლის ძვლების მოტეხილობა და მრავლობითი ჰემატომები აქვს. მანამდე მას ოპერაცია ჩაუტარდა გულმკერდის არეში.

"პაციენტს აღენიშნება მრავლობითი დაზიანებები: დაზიანებულია გულმკერდის მარცხენა ნახევარი, აღენიშნება ნაჩხვლეტი ჭრილობები, გულმკერდის ღრუში შემავალი ჭრილობები მარცხენა ფილტვის ზედა წილის დაზიანებით. აღენიშნება ზურგის, მარცხენა ბეჭის მიდამოში ნაკვეთ-ნაჩხვლეტი ჭრილობა და თავის მიდამოში, თხემზე ოთხი ჭრილობა, ნაკვეთი და დაჟეჟილი ჭრილობები", — განაცხადა ქირურგმა.

საქართველოს პირველი პრეზიდენტის, ზვიად გამსახურდიას შვილი, ცოტნე გამსახურდია 19 დეკემბრის საღამოს დაჭრეს. შემთხვევა თბილისში, ვერაზე მოხდა. ფაქტზე გამოძიება სისხლის სამართლის კოდექსის 19-108 მუხლით დაიწყო, რაც განზრახ მკვლელობის მცდელობას გულისხმობს.