კახეთში მომხდარ ავტოსაგზაო შემთხვევასთან დაკავშირებით, თავდაცვის სამინისტრო ორ ვერსიაზე მუშაობს. თავდაცვის მინისტრის, ლევან იზორიას თქმით, არ არის გამორიცხული, რომ მძღოლის გარდა, სხვა პირების პასუხისმგებლობის საკითხიც დადგეს:

"გამოძიება რამდენიმე ვერსიაზე მუშაობს, ერთ-ერთი ვერსიაა - ჰქონდა თუ არა ადგილი გადაჭარბებული სიჩქარით მოძრაობას. ასევე შიდა მოკვლევის ფარგლებში, ვაზუსტებთ რამდენად შეესაბამებოდა ესკორტირების და გაცილების წესები იმ სტანდარტებს, რომელიც არსებობს სამინისტროში. ამ ორი მიმართულებით ინტენსიურად გრძელდება საგამოძიებო პროცესი".

სამხედრო ავტომობილი, რომელშიც 36 სამხედრო მოსამსახურე და ერთი სამოქალაქო პირი იმყოფებოდა, ავარიაში ბოდბესთან ახლოს მოყვა. ჯარების ლოგისტიკური უზრუნველყოფის სარდლობის საბრძოლო მასალებისა და სამხედრო - ტექნიკური ქონების შენახვის ბაზის სამხედრო მოსამსახურეები დედოფლისწყაროდან ოსიაურისკენ გადაადგილდებოდნენ.

ავტოსაგზაო შემთხვევის შედეგად გარდაიცვალა ერთი სამხედრო მოსამსახურე. 27 დაშავებული სამხედრო მოსამსახურე ჯერ დედოფლისწყაროს საავადმყოფოში გადაიყვანეს, მოგვიანებით სამხედროების ნაწილი გორის ჰოსპიტალში, ნაწილი კი თბილისის კლინიკებში განათავსეს.