ამერიკელი მომღერალი ლენი კრავიცი 31 მაისს თბილისში, ქართველი მსმენელის წინაშე წარდგება. მუსიკალური შოუ მიხეილ მესხის სახელობის სტადიონზე გაიმართება.

პოპულარული მუსიკოსი თბილისს მსოფლიო ტურნეს Here To Love ფარგლებში ეწვევა. ევროპის მასშტაბით გამართულ ტურში საქართველო პირველი ქვეყანა იქნება.

როკი, ფანკი, ბლუზი, სოული — ლენი კრავიცი ჩვეულ სტილს არ ღალატობს და მსმენელს სხვადასხვა მუსიკალური ჟანრის სინთეზით დაუვიწყარ შოუს პირდება. მუსიკოსი შეასრულებს სიმღერებს როგორც ბოლო, რიგით მე-11 ალბომიდან Raise Vibration, ასევე მსოფლიო ჰიტებს 30-წლიანი მუსიკალური კარიერიდან.

კონცერტის ორგანიზატორი საქართველოს ბანკი და SOLO-ა, ამიტომ ბილეთების შეძენისას პრიორიტეტი სერვისის მფლობელებს ენიჭებათ. ბილეთების გაყიდვა SOLO CLUB/WM-ის მომხმარებლებისთვის 18 დეკემბერს, დილის 10 საათიდან TKT.GE-ზე დაიწყება. ხოლო 20-25 დეკემბერს ბილეთებს SOLO CLUB / SOLO / SOLO FAMILY / WM-ის მომხმარებლები შეიძენენ.

საქართველოს ბანკის ინფორმაციით, 26 დეკემბრიდან ბილეთების შეძენა შესაძლებელი გახდება ყველა სხვა ტიპის ბარათით.

კონცერტისთვის კარი 17:00 საათზე გაიხსნება, ლეგენდარული მუსიკოსი კი ქართველი მსმენელის წინაშე მოგვიანებით წარდგება. ბილეთის ფასი ექსკლუზიურად SOLO-ებისთვის 95 ლარიდან დაიწყება.

ლენი კრავიცის შესახებ

ლენი კრავიცმა1999-2002 წლებში ზედიზედ 4-ჯერ მოიპოვა გრემის ჯილდო საუკეთესო როკის შემსრულებელი კაცი ვოკალისტის ნომინაციაში. ის ამ კატეგორიაში ყველაზე მეტი ჯილდოს მფლობელია.

მისი პირველი ალბომი, Let Love Rule 1989 წელს გამოვიდა და მასში შესული თითქმის ყველა სიმღერის ტექსტის ავტორი თავად მუსიკოსია. მომღერლის ბოლო ალბომი სახელწოდებით Raise Vibration კი 2018 წლის 7 სექტემბერს გამოვიდა.

გარდა მუსიკალური კარიერისა, ლენი კრავიცს არაერთი როლი აქვს შესრულებული ფილმებსა თუ ტელე-შოუებში. სამსახიობო კარიერაში მისი დებიუტი 2009 წელს შედგა ფილმში Precious. კრავიცმა ყველაზე დასამახსოვრებელი როლი შეასრულა Hunger Games-ში.

ა2003 წელს ლენი კრავიცმა ინტერიერის დიზაინის სტუდია Kravitz Design დააფუძნა, სადაც ის მთავარი დიზაინერია. კრავიცის სტუდია დღემდე წარმატებით ახორციელებს სხვადასხვა პროექტს და თანამშრომლობს ისეთ ცნობილ ბრენდებთან, როგორებიცაა Rolex, Leica და Dom Perignon.

2019 წელს ლენი კრავიცი გაერთიანებული ერების ადამიანის უფლებათა დაცვის ორგანიზაციის კამპანიას #FightRacism შეუერთდა, რომელიც მიმართულია რასიზმის, ქსენოფობიისა და დისკრიმინაციის წინააღმდეგ. კამპანიის მიზანს წარმოადგენს ტოლერანტობისა და თანასწორობის მხარდაჭერა, რაც ეფუძნება ადამიანის უფლებათა საყოველთაო დეკლარაციას, რომელშიც ნათქვამია: "ყველა ადამიანი იბადება თავისუფალი და თანასწორი თავისი ღირსებითა და უფლებებით".

ლენი კრავიცმა, 10 დეკემბერს ბოლო ალბომის ჰიტად ქცეული სინგლის, სახელწოდებით Here to Love ახალი ვერსია გამოუშვა, რომელიც 2020 წლიდან გაეროს ადამიანის უფლებათა დაცვის ორგანიზაციის მიერ რასიზმის წინააღმდეგ არსებული კამპანიის საუნდტრეკი იქნება. აღნიშნულ კამპანიასთან დაკავშირებით მუსიკოსმა ვიდეო-მიმართვაც ჩაწერა.