"ესეც მე ვარ?" — ამ სიტყვებით საქართველოს პრეზიდენტი სალომე ზურაბიშვილი ფეისბუქზე აზიარებს მასალას, რომელიც საქართველოს კულტურულ და ტურისტულ მრავალფეროვნებასა და პოტენციალს ეხება. Euractiv-ის ვებგვერდზე ფრეიზერ კამერონის მოსაზრება "საქართველოს მზარდი რბილი ძალა" 11 დეკემბერს გამოქვეყნდა.

"უფრო და უფრო მეტი ადამიანი ფიქრობს საქართველოზე. ირლანდიის ზომის პატარა ქვეყანას აქვს საოცარი ტოპოგრაფია, ისეთივე მაღალი მთებით, როგორიც ალპებშია და სანაპიროებით, რომელიც ლაჟვარდოვან ნაპირს გაუწევს კონკურენციას. შეგიძლია შავ ზღვაში იცურაო, წახვიდე სალაშქროდ, ისრიალო მთაში და ამავე დროს ხმაურიანი ქალაქის ცხოვრებით ისიამოვნო. პეიზაჟი ნამდვილად განსაცვიფრებელია", — აღნიშნავს ავტორი.

გარდა ამისა, კამერონი ხაზს უსვამს გამორჩეულ ადგილობრივ სამზარეულოს, რომელიც მოიცავს ნიგვზიან ბადრიჯანს, ხაჭაპურს, ლობიოს, ხინკალსა და აჯაფსანდალს. სტატიაში საუბარია, რომ საქართველო ტურისტებისთვის სასურველი და მრავალფეროვანია. ამასთანავე, აღნიშნულია ქვეყნის მუსიკალური და სპორტული წარმატებებიც.

პრეზიდენტმა აღნიშნული მასალა მას შემდეგ გააზიარა, რაც ქვეყნის კულტურულ პოტენციალზე ისაუბრა და ამის კონტექსტში ჯარიც ახსენა.

"არც ჯარი გვაქვს, არც იარაღი და არც გვექნება, არც ის ეკონომიკური ძალიან დიდი პოტენციალი, რომ დავიპყროთ, თუნდაც, რეგიონი მაგრამ ჩვენ გვაქვს ის უზარმაზარი, ძალიან მაგარი იარაღი, რასაც ჰქვია, ცოდნა, მეცნიერება, კულტურა და ძალიან მდიდარი რეგიონი ამ მხრივ", — განაცხადა ზურაბიშვილმა 10 დეკემბერს ერთ-ერთ ღონისძიებაზე.

აღნიშნულ განცხადებას კრიტიკულად შეხვდნენ, როგორც ხელისუფლების, ისე ოპოზიციის წევრები. თავდაცვის მინისტრის, ირაკლი ღარიბაშვილის თქმით, მთავარსარდლისაგან მსგავსი განცხადება მიუღებელია. პარლამენტარმა სოფო კილაძემ კი აღნიშნა, რომ ზურაბიშვილი სხვა რამეს გულისხმობდა, თუმცა "პრეზიდენტმა სათქმელი ვერ გადმოსცა, რადგან საქართველოში გაზრდილი არაა".

პრეზიდენტის ადმინისტრაციის განმარტებით, ზურაბიშვილის ნათქვამი კონტექსტიდან ამოგლეჯილია და თავდაცვის ძალების დაკნინებას არ ეხებოდა. მათივე თქმით, ზურაბიშვილის გამოსვლა ჩვენი კულტურით მსოფლიოში მნიშვნელოვანი ადგილის დაკავებას გულისხმობდა.