კონსტიტუციონალისტი ვახუშტი მენაბდე მაჟორიტარ დეპუტატებს მოუწოდებს, რომ უზენაესი სასამართლოს მოსამართლეთა სიის კენჭისყრისას აჯანყდნენ.

როგორც მენაბდე ამბობს, იურიდიული კომიტეტის დღევანდელი სხდომა, სადაც მოსამართლეთა სია განიხილებოდა, "სპორტულ დარბაზს" ჰგავდა.

"ჩვენ ვნახეთ დღეს ჟურნალისტების ძიუდოს და რაგბის ილეთებით გაყვანა. ამ ფონზე კომიტეტმა გადაწყვიტა ემსჯელა ხალხზე, ვინც არის: კლანის წევრი, მისი მხარდამჭერი და ყველა ხელისუფლების მსახური. რასაც აქ მთელმა საზოგაოებამ უყურა, ეს იყო წარმოუდგენელი და აღმაშფოთებელი. ასეთი რაღაც მინახავს მხოლოდ სპორტულ დარბაზებში და ოლიმპიადაზე", — განაცხადა მენაბდემ.

იურიდიულ საკითხთა კომიტეტმა უვადოდ დასამტკიცებელი 14 მოსამართლის სიას რეკომენდაცია გაუწია. სიას კომიტეტის 8 წევრის მხარდაჭერა ჰქონდა. ახლა უკვე პლენარულ სხდომაზე კენჭისყრაა დარჩენილი.

იურიდიული კომიტეტის სხდომის შესვენებიდან მანდატურებმა ჟურნალისტები ძალის გამოყენებით გაიყვანეს.