ოკუპირებულ ტერიტორიაზე მოკლული გიგა ოთხოზორიას დედა, ჯულიეტა ჭანტურია აცხადებს, რომ ჯარზე ასეთი სიტყვები არ ეპატიება პრეზიდენტს, რომელიც ამავე დროს მთავარსარდალია. ამის შესახებ მან ტელეკომპანია ფორმულას განუცხადა.

"არ მაქვს ჯარი, არ მაქვს იარაღი და არც მექნება, მაშინ რისი მთავარსარდალია. მისი ნათქვამი, მგონია, რომ ჩვენი მტრის წისქვილზე ასხამს წყალს", — აცხადებს ჯულიეტა ჭანტურია.

10 დეკემბერს ერთ-ერთ ღონისძიებაზე სალომე ზურაბიშვილმა თქვა, რომ "არც ჯარი გვაქვს, არც იარაღი და არც გვექნება, არც ის ეკონომიკური ძალიან დიდი პოტენციალი, რომ დავიპყროთ, თუნდაც, რეგიონი". აღნიშნულ განცხადებას კრიტიკულად შეხვდნენ, როგორც ხელისუფლების, ისე ოპოზიციის წევრები.

თავდაცვის მინისტრის, ირაკლი ღარიბაშვილის თქმით, მთავარსარდლისაგან მსგავსი განცხადება მიუღებელია. პარლამენტარმა სოფო კილაძემ კი აღნიშნა, რომ ზურაბიშვილი სხვა რამეს გულისხმობდა, თუმცა "პრეზიდენტმა სათქმელი ვერ გადმოსცა, რადგან საქართველოში გაზრდილი არაა".

პარლამენტის ვიცე-სპიკერის, მამუკა მდინარაძის თქმითვე, ადამიანს შეიძლება სხვა რამის თქმა უნდოდეს, მაგრამ მსგავს განცხადებებს მეტი ყურადღება უნდა მიექცეს.

პრეზიდენტის ადმინისტრაციის განმარტებით, ზურაბიშვილის ნათქვამი კონტექსტიდან ამოგლეჯილია.

"პრეზიდენტი კიდევ ერთხელ ხაზგასმით აღნიშნავს, რომ ეს არანაირად არ ეხებოდა საქართველოს თავდაცვის ძალებს და მათი ღირსების დაკნინებას. ასეთი ყალბი ინტერპრეტაციის გავრცელება არა მხოლოდ პრეზიდენტის დისკრედიტაციის მცდელობა და ბულინგია, არამედ ეს უპირველესად აზიანებს ქვეყნის ინტერესებს და უსაფრთხოებას", — აცხადებენ ადმინისტრაციაში.