რუსეთიდან დაბრუნებული ნინო ბურჯანაძე აცხადებს, რომ გავრილოვის ღამისთვის მას ბოდიში არ მოუხდია და მან წუხილი გამოხატა. ბურჯანაძის მტკიცებით, მისი სიტყვების კონტექსტი არასწორად გაიგეს.

"ეს იყო წუხილი იმასთან დაკავშირებით, რაც მოჰყვა ამ პროცესებს, როგორც აქციის დარბევასთან დაკავშირებით, თუნდაც იმ ძალიან უკიდურესად, ასე ვთქვა, პროტესტის უზრდელურ ფორმასთან დაკავშირებით, რომელიც ზოგიერთმა კონკრეტულმა ადამიანმა გამოხატა. ეს ნამდვილად არ ეკადრება ქართველებს, არ ეკადრება ქართველი კაცის თავმოყვარეობას", — განაცხადა ბურჯანაძემ მედიასთან.

6 დეკემბერს რუსულმა სახელისუფლებო გამოცემა TASS-მა გაავრცელა ინფორმაცია, რომ ნინო ბურჯანაძემ 20 ივნისს განვითარებული მოვლენებისთვის ბოდიში მოიხადა. ამასთანავე გამოცემა აღნიშნავს, რომ ფედერაციის საბჭოს საგარეო ურთიერთობათა კომიტეტის თავმჯდომარემ, კონსტანტინ კოსაჩოვმა ბურჯანაძეს მადლობა გადაუხადა.

გარდა ამისა, ნინო ბურჯანაძის ბოდიში ისმის აუდიომასალაში, რომელიც გამოცემამ გაავრცელა.

კოსაჩოვი: თქვენ იცით, რომ რუსეთში ქართულ პოლიტიკის განვითარებული რამდენიმე სიუჟეტი მტკივნეულ რეაქციას იწვევს. ჩვენ გვახსოვს პროვოკაცია საქართველოს პარლამენტში მართლმადიდებლობის საპარლამენტთაშორისო ასამბლეის სესიის დროს...

ბურჯანაძე: არ შემეშინდება მოვიბოდიშო ამ სრულიად საშინელი ინციდენტის გამო. მაპატიეთ, რომ შეგაწყვეტინეთ, მაგრამ ვერ დაგასრულებინებთ, სანამ არ მოვიბოდიშებ, რადგან მიმაჩნია, რომ ეს პირველ რიგში, ქართველი ხალხის, ქართული სახელმწიფოს შეურაცხყოფაა. ჩვენ, ყველა ნორმალურმა ადამიანმა ეს ვიგრძენით, როგორც საკუთარი შეურაცხყოფა და საკუთარი ქვეყნის შეურაცხყოფა. მინდა, რომ ეს იცოდეთ.

3 დეკემბერს პარტია დემოკრატიული მოძრაობა — ერთიანი საქართველოს ლიდერი ნინო ბურჯანაძე მოსკოვში გაფრინდა. პოლიტიკოსი შეხვედრას პრეზიდენტის ადმინისტრაციაში გამართავს, თუმცა პრესსამსახურის თქმით, უცნობია უშუალოდ ვლადიმერ პუტინს შეხვდება თუ არა.

რუსეთში მისი ვიზიტის გამო პროპორციულ საარჩევნო სისტემასთან დაკავშირებული ოპოზიციური გაერთიანება დატოვა თაკო ჩარკვიანმა და მისმა პარტიამ. ამასთანავე, პოლიტიკოსის ვიზიტი დაგმო მოძრაობამ სირცხვილია.

გაიგეთ მეტი: