ახალი პოლიტიკური ცენტრი გირჩი ახალ, მეცხრე მოწვევის პარლამენტს მიმართავს. გირჩი მიიჩნევს, უახლოეს პერიოდში, საშუალო და გრძელვადიან პერსპექტივაში ყველაზე მნიშვნელოვანი ორი საკითხი, რომელიც უკეთესად უნდა დარეგულირდეს საკონსტიტუციო დონეზე, არის პოლიტიკური სტაბილურობისა და სწრაფი ეკონომიკური განვითარებისთვის აუცილებელი კონსტიტუციური გარანტიები:

პოლიტიკური სტაბილურობისთვის:

  • გაუქმდეს მაჟორიტარული არჩევნები;
  • შემოღებულ იქნას სრულად პროპორციული, ან პროპორციულ-ნაწილობრივ რეგიონულ-პროპორციული სისტემა;
  • დაიწიოს საარჩევნო ბარიერი 1 პროცენტამდე.

ეკონომიკური სტაბილურობისთვის:

  • ნაერთი ბიუჯეტის ხარჯებისა და არაფინანსური აქტივების ზრდის მთლიანი მოცულობის შეფარდება მთლიან შიდა პროდუქტთან არ უნდა აღემატებოდეს 15%-ს; 2020 წლისთვის ეს მაჩვენებელი უნდა შემცირდეს 22%-მდე, ხოლო 2024 წლისთვის 15%-მდე;
  • ნაერთი ბიუჯეტის დეფიციტი უნდა იყოს დაუშვებელი;
  • მთავრობის ვალის შეფარდება მთლიან შიდა პროდუქტთან არ უნდა აღემატებოდეს 15%-ს; 2020 წლისთვის ეს მაჩვენებელი უნდა შემცირდეს 30%-მდე, ხოლო 2024 წლისთვის 15%-მდე;
  • 2018 წლისთვის ქვეყანა უნდა გადავიდეს თავისუფალ სავალუტო რეჟიმზე; გადასახადების აკრეფა უნდა მოხდეს დოლარში.

გირჩი მიიჩნევს, რომ უკვე გაჟღერებული საკონსტიტუციო ცვლილებების ნაცვლად, პარლამენტმა უნდა იფიქროს ეკონომიკური და პოლიტიკური გარემოს დასტაბილურებაზე, რაც პარტიის აზრით, ქვეყნის მთავარი გამოწვევაა:

"ჯერჯერობით განხილვის თემებია ერთი პარტიის ხელში საკონსტიტუციო უმრავლესობის საშიშროება, ხოლო საშიშროებად დასახულია პარლამენტის ქუთაისიდან თბილისში გადმოტანა, პრეზიდენტის არჩევის წესის შეცვლა ისე რომ მას საყოველთაო სახალხო არჩევნების ნაცვლად ირჩევდეს პარლამენტი და კონსტიტუციით ოჯახის თუ ქორწინების შინაარსის განსაზღვრა.

პირველ რიგში უნდა გვესმოდეს რა სჭირდება ყველაზე მეტად ქვეყანას უახლოეს მომავალში, არსებული გამოწვევების გათვალისწინებით, ისევე როგორც გრძელვადიან პერსპექტივაში ძლიერ ევროპულ სახელმწიფოდ ჩამოყალიბებისათვის და რაზე არის შესაძლებელი კონსენსუსის მიღწევა მომავალ პარლამენტში".