ფინანსთა სამინისტროს საგამოძიებო სამსახურმა 20 ცალი ყალბი 500-ევროიანი კუპიურის გასაღების ბრალდებით უცხო ქვეყნის ორი მოქალაქე დააკავა.

როგორც უწყებაში აღნიშნავენ, დაკავებულებმა ყალბი ფული საქართველოში შემოიტანეს და ქვემო ქართლში გაასაღეს. მათივე თქმით, საგამოძიებო მოქმედებების შედეგად, ამოღებულია 10 000 ევროს ოდენობის ყალბი კუპიურა.

საქართველოს ფინანსთა სამინისტროს საგამოძიებო სამსახურის თანამშრომლებმა, ოპერატიულ - სამძებრო და საგამოძიებო მოქმედებების შედეგად, დიდი ოდენობით ყალბი ფულის გასაღების ფაქტზე, უცხო ქვეყნის ორი მოქალაქე დააკავეს.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც ყალბი ფულის ან ფასიანი ქაღალდის დამზადება ან გასაღებას გულისხმობს. აღნიშნული მუხლი სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.