ქართული ოცნების დეპუტატის, დიმიტრი ხუნდაძის თქმით, მაჟორიტარულ სისტემასთან დაკავშირებით ათმა დეპუტატმა საინიციატივო ჯგუფი უკვე დაარეგისტრირა. მისივე განმარტებით, საპროცედურო საკითხთა კომიტეტს ერთი კვირაა, რათა მათი ინიციატივა განიხილოს.

"იმედი მაქვს, უმტესობა საზოგადოებისა ამას შეხვდება პოზიტიურად და ვნახოთ, რომელი პარლამენტი არ დაუჭერს მხარს საზოგადოების ასეთ მოთხოვნას", — განაცხადა ხუნდაძემ.

მისივე თქმით, მაჟორიტარული სისტემის მომხრე დეპუტატები უმრავლესობის წევრებს შეხვდნენ და ამ შეხვედრაზე დაპირისპირება და უთანხმოება იყო. ხუნდაძის მტკიცებით, უმრავლესობის ლიდერი და ვიცე-სპიკერი, მამუკა მდინარაძე მათი ინიციატივის წინააღმდეგია.

დიმიტრი ხუნდაძე ერთ-ერთი ის დეპუტატია, რომელმაც პროპორციულ საარჩევნო სისტემას მხარი არ დაუჭირა და მის ჩაგდებას ცდილობდა. მას შემდეგ, რაც პარლამენტმა პროექტი ვერ მიიღო, ხუნდაძემ სრულად მაჟორიტარულ საარჩევნო სისტემაზე გადასვლის ინიციატივა წამოაყენა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ სრულად ოპოზიციურმა სპექტრმა და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ.