ზუგდიდში, ნაციონალური მოძრაობის ოფისთან მომხდარ ინციდენტზე შინაგან საქმეთა სამინისტრომ გამოძიება სისხლის სამართლის კოდექსის 187-ე, ნივთის დაზიანება ან განადგურების მუხლით, დაიწყო. ადგილობრივი გამოცემა Livepress-ის ცნობით, ქართული ოცნების მხარდამჭერებმა ოფისის მინა ჩაამსხვრიეს. ამას გარდა, აქციის მონაწილის მიერ ყავარჯნის სროლისას სამართალდამცველი მსუბუქად დაშავდა.

ქართული ოცნების მხარდამჭერებმა, ააიპ-ების თანამშრომელთა მონაწილეობით ნაციონალური მოძრაობის ოფისს კვერცხები, ცოცხები, ბოთლები და პატარა პლასტმასის კასრები ესროლეს, ასევე, შესასვლელთან ყავარჯნები და საპროტესტო პლაკატები დატოვეს

აქციის მონაწილეებმა ადგილზე ბანერები მიიტანეს წარწერით "გვახსოვს 7 ნოემბერი" და "არ დავუშვებთ". ნაციონალური მოძრაობის მხარდამჭერებმა კი საკუთარი ოფისის ფანჯრებიდან დოლარის კუპირები გადმოყარეს.

ზუგდიდის მსგავსად, დაპირისპირება იყო ქობულეთის საკრებულოსა და მცხეთის მერიასთან, ოპოზიციის აქციის პარალელურად ქართული ოცნების მხარდამჭერების კონტრაქციაც იმართებოდა. აქციაზე ქართული ოცნების მხარდამჭერები განსაკუთრებული აგრეისულობით გამოირჩეოდნენ ოპოზიციის ლიდერების მიმართ. ნაციონალური მოძრაობის წევრს ზაალ უდუმაშვილს ცოცხი ესროლეს, ხოლო ევროპული საქართველოს ერთ-ერთ ლიდერს გიგა ბოკერიას წყალი შეასხეს.

2 დეკემბრის კი ქართული ოცნების ახალგაზრდული ფრთის წევრებმა და პარტიის სხვა მხარდამჭერებმა მმართველი პარტიის ოფისთან კონტრაქცია გამართეს. ისინი სიტყვიერ შეურაცხყოფას აყენებდნენ და ფიზიკურად უსწორდებოდნენ მოძრაობა #სირცხვილიას, გაბედეს და შეცვალეს აქტივისტებს. აქტივისიტები ამბობენ, რომ აგრესიული პირები მათ ესროდნენ შუშხუნებს, რომელიც ერთ-ერთ აქტივისტს თვალში მოხვდა. მათივე თქმით, დაშავდა 5 ადამიანი.