"კულტურული... წიგნის გახსნა, ზოგადად, ცუდი არ უნდა იყოს. ტყვიებს ნუ გვესვრიან, ოკუპაციას თავი დაანებონ, კულტურულ ღონისძიებებს თუ რამეს გააკეთებენ, მერე რა მოხდა", — ასე გამოეხმაურა ქართული ოცნების დეპუტატი ვიქტორ ჯაფარიძე რუსეთის წარმომადგენლის, გრიგორი კარასინის განცხადებას. ჯაფარიძის განცხადების ვიდეომასალას ფორმულა ავრცელებს.

ვიქტორს ჯაფარიძე ერთ-ერთი ის მდუმარე დეპუტატია, რომელიც 2016 წლის შემდეგ პარლამენტის პლენარულ სხდომაზე სიტყვით არც ერთხელ არ გამოსულა. გარდა ამისა, მან "პრინციპული პოზიცია დაიკავა" და მხარი არ დაუჭირა მის მიერვე ინიცირებულ კანონპროექტს, რომელიც 2020 წლის არჩევნების ჩატარებას პროპორციული საარჩევნო სისტემით ითვალისწინებდა.

გარდა ამისა, 2018 წელს ვიქტორ ჯაფარიძე ხორავას ქუჩის საქმეზე დანაშაულის შეუტყობინებლობისთვის დაკავებულ მირზა სუბელიანთან ციხეში იყო შესული. ჯამში ის სუბელიანთან ხუთჯერ შევიდა. დეპუტატი მსჯავრდებულთან ციხეში იმ დღესაც შევიდა, როცა რუსთავი 2-მა მათი აუდიოჩანაწერის P.S.-ში გასვლა დააანონსა. ჩანაწერებში, სავარაუდოდ მირზა სუბელიანი ქართული ოცნების უკანონო საქმიანობაზე საუბრობდა.

დღეს, 29 ნოემბერს რუსულ სახელისუფლებო მედიაში გავრცელდა რუსეთის საბჭოს სენატორის, გრიგორი კარასინის კომენტარი იმის შესახებ, რომ საქართველოში რუსული ენისა და კულტურის ცენტრის გახსნა იგეგმება. მისი მტკიცებით, ამის შესახებ რუსეთთან ურთიერთობის საკითხებში საქართველოს პრემიერის სპეციალურ წარმომადგენელთან, ზურაბ აბაშიძესთან შეხვედრისას შეთანხმდა.

On.ge-სთან საუბარში ზურა აბაშიძე არ ადასტურებს, რომ შეთანხმება შედგა. მისი თქმით, მან კარასინისგან მოისმინა, რომ ერთ-ერთ კომერციულ ცენტრს მსგავსი იდეა აქვს და უპასუხა, რომ სიტუაციაში თბილისში ჩასვლისთანავე გაერკვეოდა.

"მე მოვისმინე მოკლე კომენტარი ბატონი კარასინისგან იმის თაობაზე, რომ რუსეთის სავიზო ცენტრი თბილისში, რომელიც ბოლო ორი წელია გასცემს ვიზებს და ეს გახლავთ კომერციული სტრუქტურა, აპირებს კომერციულ საწყისებზე რუსული ენის ცენტრის გახსნას. ჩემი პასუხი იყო ასეთი, რომ ჩავალ თბილისში და გავერკვევი რაზეა საუბარი. ამაზე მეტი საუბარი ჩვენ ამ თემაზე არ გვქონია", — განაცხადა აბაშიძემ.