იუსტიციის მინისტრმა, თეა წულუკიანმა პარლამენტის ეროვნული ბიბლიოთეკის შენობა პოლიციის დახმარებით დატოვა. მინისტრმა კორდონის გავლის გარეშე შენობაში ვერც შესვლა შეძლო.

წულუკიანს ეროვნულ ბიბლიოთეკასთან აქტივისტები დახვდნენ, ის შენობაში სტვენის და შეძახილების ფონზე შევიდა. მოგვიანებით, მან აღნიშნა, რომ აქციის მონაწილეებთან სალაპარაკო არაფერი აქვს და თემა დახურულია. მინისტრის შესვლისას მოხდა დაპირისპირება პოლიციასთან, რა დროსაც ტერიტორიიდან ოპოზიციის ლიდერები გაიყვანეს.

"არ გამიჭირდა, მადლობა პოლიციელებს, რომლებიც სტვენებს... არაფერი არ მაქვს მათთან სალაპარაკო. თემა დახურულია, მოემზადონ არჩევნებისთვის", — თქვა თეა წულუკიანმა ჟურნალისტებთან საუბრისას.

ოპოზიციის ლიდერები და სამოქალაქო აქტივისტები ეროვნულ ბიბლიოთეკასთან პარლამენტიდან მსვლელობით მივიდნენ. აქტივისტები ამბობენ, რომ ყველგან და ყოველთვის შეუქმნიან დისკომფორტს ქართული ოცნების წევრებს. ბიბლიოთეკასთან მობილიზებულია პოლიცია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.