თავდაცვის მინისტრის ირაკლი ღარიბაშვილის შეფასებით, ბიძინა ივანიშვილმა "ჩვეული გულრწფელობით" გასცა პასუხი ყველა იმ კითხვას, რომელიც საზოგადოებას აწუხებს. ასე გამოეხმაურა ღარიბაშვილი ქართული ოცნების თავმჯდომარის ბიძინა ივანიშვილის იმედისთვის მიცემულ ინტერვიუს.

ამასთან, ღარიბაშვილის განცხადებით, ქვეყნის გრძელვადიან განვითარებას "ექსტრემისტული ოპოზიცია" აფერხებს.

"მე მინდა, გამოვეხმაურო პარტიის თავმჯდომარის, ბატონი ბიძინა ივანიშვილის გუშინდელ ინტერვიუს. ჩემი შეფასება არის შემდეგი, რომ ბატონი ბიძინა ჩვეული გულწრფელობით არის მოწოდებული. მან სრულად, გულწრფელად გასცა პასუხი ყველა იმ კითხვას, რომელიც დღეს საზოგადოებას აწუხებს და ყველა იმ აბსურდულ ბრალდებას და ცილისწამებას, რომელიც მომდინარეობს ყველაზე რადიკალური, დესტრუქციული და ექსტრემისტული ოპოზიციად წოდებული ძალის მხრიდან”, – განაცხადა ღარიბაშვილმა.

იმედისათვის ჩაწერილი ბიძინა ივანიშვილის ინტერვიუ ეთერში 27 ნოემბერს გავიდა. ივანიშვილმა ინტერვიუში მიმდინარე მოვლენებზე ისაუბრა და განაცხადა, რომ 2020 წლისათვის პროპორციული საარჩევნო სისტემის პროექტის ჩაგდება სამწუხარო იყო, თუმცა აქედან მრავალმხრივი დასკვნები უნდა გაკეთდეს.