პოლიციასთან დაპირისპირების შემდეგ სტუდენტებმა პარლამენტის წინ კარვის გაშლა მაინც დაიწყეს. ადგილზე მისული იყო ევროპული საქართველოს წევრი, ელენე ხოშტარიაც.

"ხელოვნურად რატომ ქმნით პრობლემას? ტანსაცმელს რომ იცვლით, ვინმეს ეკითხებით? აი, ეგრე ვიცვლი [კარავს]", — უთხრა ხოშტარიამ პოლიციას. ის ამბობდა, რომ პოლიციის შეზღუდვა არაკანონიერია.

როგორც ორგანიზაცია ევროპელი სტუდენტები თავისუფლებისთვის წევრმა დაჩი იმედაძემ მთავარ არხს უთხრა, პოლიცია ახალი კარვის დადგმაზე უარს ეუბნებოდა და ამის მიზეზად საფეხმავლო გზის დაბლოკვას ასახელებდა:

"სირცხვილიამ დაგვითმო თავისი კარვის ადგილი და შემოგვთავაზეს, რომ მათი კარვის ნაცვლად დაგვედგა. აქაც იყო წინააღმდეგო, ამჯერად მოვახერხეთ შემოტანა".

28 ნოემბერს ოპოზიცია პარლამენტის პიკეტირებას ისევ აპირებს. პიკეტირება პლენარული სხდომის პარალელურად იგეგმება.

ორი დღის წინ, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

შინაგან საქმეთა სამინისტროს ინფორმაციით აქციის დაშლის დროს 28 პირი დააკავეს, სამი ადამიანი კი დაშავდა. იმის მიუხედავად, რომ სამართალდამცავებმა პარლამენტის ორი დეპუტატი წაიყვანეს, შსს-ს ვერსიით, ეს დაკავება არ იყო. ახლა გიგა ბოკერიაც და თენგიზ გუნავაც თავისუფალია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.