სააპელაციო სასამართლოს მოსამართლე, ლევან თევზაძე, რომელმაც რამდენიმე თვის წინ ინტერესთა კონფლიქტის გამო კანდიდატურა მოხსნა, დღეს ისევ უზენაესის მოსამართლეობის პრეტენდენტია. ის პრობლემას ვეღარ ხედავს იმაში, რომ იუსტიციის საბჭოს მოსამართლე წევრის, ირაკლი შენგელიას ცოლის ძმაა. მოსამართლე თევზაძის თქმით, "დავიდარაბის" ასაცილებლად, კანონში მაინც უნდა იყოს ჩანაწერი, რომ "ცოლის ძმა არ უნდა იყოს" საბჭოს წევრებში:

"...მე პრობლემას ვერ ვხედავ ამაში, ან მე არ ვიქნებოდი, ან ირაკლი [შენგელია]. ვინმე თუ ფიქრობს, რომ ირაკლი არის დღეს საბჭოში, სანამ ირაკლი იქნებოდა, მე ვიყავი... იმაზე აპელირება, რომ საბჭოს წევრია, კოლეგები ვართ აქ და კონსტიტუციითაა რომ მოსამართლე წევრები უნდა იყვნენ. მაშინ ესეც აცილების საფუძველი უნდა იყოს".

მოსამართლე ლევან თევზაძემ უზენაესი სასამართლოს მოსამართლეების კონკურსში თავისი კანდიდატურა სექტემბერში მოხსნა. თევზაძე ამჟამად თბილისის სააპელაციო სასამართლოს სისხლის საქმეთა პალატის თავმჯდომარეა და იყო იუსტიციის საბჭოს წევრიც. ნაზი ჯანეზაშვილი ინტერესთა კონფლიქტზე კონკურსის მიმდინარეობისას საუბრობდა და ამბობდა, რომ საბჭოს მოსამართლე წევრის, ირაკლი შენგელიას მოსამართლეების შერჩევის პროცესში მონაწილეობა სწორედ ამ მიზეზით არ უნდა მიეღო.

თავად თევზაძე მიიჩნევს, რომ ის კონკურსის ყველა პირობას აკმაყოფილებდა, თუმცა კანდიდატურა მაშინ მაინც მოხსნა.

"მხედველობაში მივიღე მიმდინარე პროცესის მნიშვნელობა სასამართლო სისტემისთვის და მიზანშეწონილად მივიჩნიე, მიმემართა იუსტიციის უმაღლესი საბჭოსათვის კანდიდატურის მოხსნის თაობაზე, რათა ჩრდილი არ მიადგეს ამ ისტორიულ პროცესს", — ამბობდა მოსამართლე.