პროკურატურამ 20 ივნისს დაშავებული გიორგი სულაშვილი დაზარალებულად "გავრილოვის ღამიდან" 5 თვის შემდეგ ცნო.

"საქართველოს გენერალურ პროკურატურაში მიმდინარე გამოძიების ფარგლებში, სასამართლო-სამედიცინო ექსპერტიზის დასკვნის მიღების და შესაძლო დანაშაულებრივ ეპიზოდებთან დაკავშირებით დამატებითი საგამოძიებო მოქმედებების ჩატარების შემდეგ, დაზარალებულად იქნა ცნობილი გიორგი სულაშვილი", — ნათქვამია განცხადებაში.

მათი თქმით, გამოძიების ფარგლებში ასობით საგამოძიები მოქმედება ჩატარდა.

"გამოკითხულია 700-ზე მეტი პირი, მათ შორის სამართალდამცავები. გამოკვლეულია პარლამენტის მიმდებარე ტერიტორიაზე განვითარებული მოვლენების ამსახველი შესაბამისი ვიდეომასალა. დანიშნულია ექსპერტიზები. რაც შეეხება მიმდინარე გამოძიების ფარგლებში სხვა პირების დაზარალებულად ცნობის საკითხს, საგამოძიებო პროცედურების დასრულების შემდეგ თითოეულ ფაქტთან დაკავშირებით მიღებული იქნება შესაბამისი სამართლებრივი გადაწყვეტილება, რის შესახებაც საზოგადოებას პერიოდულად მიეწოდება ინფორმაცია", — აღნიშნულია განცხადებაში.

20-21 ივნისის ღამეს სამართალდამცავებმა აქცია ძალის გადამეტებით დაშალეს. ამ ღამეს დაშავდა რამდენიმე ათეული ადამიანი, მათ შორის ორმა — მაკო გომურმა და გიორგი სულაშვილმა თვალი დაკარგეს. რაც შეეხება მაკო გომურს, ის დაზარალებულად 11 ნოემბერს ცნეს.