11 მაისიდან 26 მაისის ჩათვლით, ბრიტანელი და ამერიკელი სამხედროები ქართველ სამხედროებს ნატოს სწრაფი რეაგირების ძალებში (NRF) მონაწილეობისთვის სამხედრო წვრთნებს ჩაუტარებენ.

აშშ-სა და დიდი ბრიტანეთის სამხედრო მოსამსახურეები უკვე თბილისში არიან. ინფორმაციას თავდაცვის სამინისტრო ავრცელებს:

"4 ერთეული აშშ-ის შეიარაღებული ძალების კუთვნილი სამხედრო თვითმფრინავი და ერთი ბრიტანული ავიალაინერი ქვეყანაში გამთენიისას დაეშვა. სამხედრო მოსამსახურეებს სწავლება "ღირსეული პარტნიორის" ხელმძღვანელები - პოლკოვნიკი არჩილ ომიაძე და პოლკოვნიკი ჯეფ დიკენსონი, ასევე ბრიტანეთის სამხედრო ატაშე საქართველოში, ვიცე-პოლკოვნიკი ნიკ ვილკესი დახვდნენ".

Noble Partner 2016-სთვის განკუთვნილი ამერიკული ტექნიკა უკვე ვაზიანშია. თავდაცვის სამინისტროს ინფორმაციით სწავლების სცენარი სტაბილურობის, შეტევა/თავდაცვის ოპერაციებს გულისხმობს.

ბრიტანეთის სამხედრო ატაშემ საქართველოში, ვიცე-პოლკოვნიკმა ნიკ ვილკესმა, აღნიშნა, რომ ეს სწავლება ქართველი, ამერიკელი და ბრიტანელი სამხედროებისთვის ურთიერთთავსებადობის დასახვეწად კარგი შესაძლებლობაა:

"ისინი ისწავლიან როგორ იმოქმედონ ერთად. უნდა აღვნიშნო, რომ ესაა ყველაზე დიდი ბრიტანული დანაყოფი, რომელიც საქართველოში ოდესმე ჩამოსულა სწავლებაში მონაწილეობის მისაღებად".

თავდაცვის სამინისტროს ინფორმაციით, პირველად საქართველოს შეიარაღებული ძალების ისტორიაში სწავლებაში M1A2 ტიპის ამერიკულ ტანკებს "აბრამსებს" გამოიყენებენ. წვრთნაში ასევე ჩართული იქნება C-130 ტიპის ამერიკული სამხედრო თვითმფრინავი და სხვა აღჭურვილობა.

"ღირსეული პარტნიორი 2016" ვაზიანის სამხედრო პოლიგონზე წელს მეორედ გაიმართება და მასში აშშ-ის არმიის ევროპული სარდლობის 650, 500 ქართველი და 150 ბრიტანელი სამხედრო მიიღებს მონაწილეობას.