პარლამენტის მიმდებარე ტერიტორიაზე აქციის მონაწილეები იშლებიან. პროტესტის გაგრძელება ხვალიდან იგეგმება, ჯერ სასამართლოსთან, შემდეგ ისევ პარლამენტის შენობასთან.

"დღეს წავაგეთ და წავედით ჭრილობები მოვიშუშოთ, ხვალ 10-ზე სასამართლოსთან და 7-ზე აქციაზე პარლამენტთან", — მიმართა მოქალაქეებს ერთ-ერთმა ორგანიზატორმა, შოთა დიღმელაშვილმა.

აქციის მონაწილეთა ნაწილი წინააღმდეგია წასვლის და დარჩენას აპირებს. თუმცა ორგანიზატორები მათ განუმარტავენ, რომ არ აქვთ რესურსი მათი ღამით დარჩენა უზრუნველყონ, ვინაიდან აღარც პლედი, არც შეშა და აღარც კარვებია. რუსთაველზე შეკრებილებს აქციის დროებით დაშლის იდეა მაინც არ მოსწონთ და დარჩენას ფიქრობენ.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

სპეცრაზმელებმა პარლამენტის ცენტრალურ შესასვლელთან აქციის დასაშლელად წყლის ჭავლი გამოიყენეს, მოგვიანებით კი რუსთაველის გამზირზე ჩავიდნენ და მიწოლით გაათავისუფლეს საავტომობილო გზა. ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 18 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.