წითელი ჯვრის საერთაშორისო კომიტეტმა ცხინვალის ციხეში უკანონოდ დაკავებული ვაჟა გაფრინდაშვილი მოინახულა. ქართველი ექიმი ე.წ. საზღვრის კვეთის ბრალდებითაა დაკავებული და მას 2-თვიანი პატიმრობა აქვს შეფარდებული.

წითელი ჯვრის საერთაშორისო კომიტეტმა (წჯსკ) გაფრინდაშვილი დღეს, 2019 წლის 18 ნოემბერს, დღის 14:00 საათზე მოინახულა. კომიტეტის ცნობით, მას გაფრინდაშვილის ოჯახი დაუკავშირდა.

"მოქმედებდა რა საკუთარი საერთაშორისო ჰუმანიტარული მანდატის ფარგლებში, წითელი ჯვრის საერთაშორისო კომიტეტმა მოითხოვა ციხეში მისი მონახულება და დელეგატებმა ბ-ნი გაფრინდაშვილი დღეს მოინახულეს. ვიზიტის დროს ბ-ნ ვაჟას გადაეცა ოჯახის წერილი, რაზეც მან წერილობითვე უპასუხა. წითელი ჯვრის საერთაშორისო კომიტეტმა ვიზიტის შესახებ უკვე აცნობა ბ-ნი ვაჟა გაფრინდაშვილის ოჯახს", — წერია განცხადებაში.

თავისუფლების აღკვეთის ადგილებში წითელი ჯვრის საერთაშორისო კომიტეტის ვიზიტების შესახებ ინფორმაცია კონფიდენციალურია. კომიტეტი აცხადებს, რომ ვიზიტები ორმხრივი დიალოგის ფარგლებში განიხილება დაკავებაზე პასუხისმგებელ მხარესთან, "დაკავებული პირებისა და მათი ოჯახების საუკეთესო ინტერესების გათვალისწინებით".

9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს. საოკუპაციო რეჟიმმა მას ე.წ. საზღვრის კვეთის ბრალდებით ორთვიანი პატიმრობა შეუფარდა.

ექიმი დავით ღვინიაშვილი, რომელმაც გათავისუფლებული პატიმრები მოინახულა ყვება, რომ ერთადერთ რამეს ითხოვენ ვაჟა გაფრინდაშვილისაგან — აღიაროს საზღვრის გადაკვეთა, რაზედაც ექიმი კატეგორიულ უარს აცხადებს და ამბობს, რომ იმყოფება საქართველოში, ქართულ მიწაზე.

დღეს, 18 ნოემბერს, საქართველოს რეგიონებში ვაჟა გაფრინდაშვილის მხარდასაჭერად "თეთრხალათიანების აქცია" გაიმართა.