პრეზიდენტის ადმინისტრაციის ინფორმაციით, სალომე ზურაბიშვილმა ცხინვალის საოკუპაციო რეჟიმის მიერ ექიმ ვაჟა გაფრინდაშვილის უკანონო დაკავებასთან დაკავშირებით საერთაშორისო ორგანიზაციების ხელმძღვანელებს მიმართა. პრეზიდენტი მათ მოუწოდებს, გამოიყენონ ყველა არსებული საშუალება, რათა ოკუპირებულ რეგიონში გამოსწორდეს ვითარება და უმოკლეს დროში გათავისუფლდეს ქართველი ექიმი.

სალომე ზურაბიშვილმა განცხადებით მიმართა: გაეროს გენერალურ მდივანს — ანტონიუ გუტერეშს, გაეროს გენერალური მდივნის მოადგილეს პოლიტიკურ და მშვიდობის საკითხებში — როზმარი დიკარლოს, ევროკომისიის პრეზიდენტს — ურსულა ფონ დერ ლაიენს, ეუთოს თავმჯდომარეს — მიროსლავ ლაიჩაკს, ევროპის საბჭოს გენერალურ მდივანს — მარია პეიჩინოვიჩ-ბურიჩს. ასევე, ჟენევის საერთაშორისო მოლაპარაკებების თანათავმჯდომარეებს: გაეროს წარმომადგენელს — ჩიჰან სულტანოგლუს, ეუთოს თავმჯდომარეს სპეციალურ წარმომადგენელს — რუდოლფ მიჩალკას ევროკავშირის სპეციალურ წარმომადგენელს — ტოივო კლაარს, გაეროს ადამიანის უფლებათა უმაღლეს კომისარს — მიშელ ბაშელეს, ევროპის საბჭოს ადამიანის უფლებათა კომისარს — დუნია მიატოვიჩს.

ქართველ ექიმს, ვაჟა გაფრინდაშვილს საოკუპაციო რეჟიმმა ე.წ. საზღვრის კვეთის ბრალდებით ორთვიანი პატიმრობა შეუფარდა. დე-ფაქტო რეჟიმის საინფორმაციო სააგენტო რესის ინფორმაციით, საქმეზე საბოლოო გადაწყვეტილება არ დამდგარა და გამოძიება გრძელდება.

მათივე ინფორმაციით, 9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს. დე-ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს.

ვაჟა გაფრინდაშვილის ოჯახის წევრები ვარაუდობდნენ, რომ ექიმი ოკუპირებულ ტერიტორიაზეა ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. მათი აზრით, ექიმი სწორედ მაშინ დააკავეს.