თბილისში დაჭრილი და ნაცემი ტრანსგენდერი ქალის მდგომარეობა ისევ მძიმეა, ამის შესახებ On.ge-ს დაზარალებულის ადვოკატმა ციალა რატიანმა აცნობა:

"მისი მდგომარეობა კვლავინდებურად მძიმეა და არ შეცვლილა".

14 ოქტომბერს ღამით თბილისში 32 წლის ტრანსგენდერი ქალი დაჭრეს. მას თავი გაუჩეჩქვეს და ყელი გამოჭრეს.

შინაგან საქმეთა სამინისტრომ გუშინ მისი განზრახ მკვლელობის მცდელობის ბრალდებით, 1985 წელს დაბადებული, წარსულში ნასამართლევი, ამჟამად პირობითი მსჯავრის ქვეშ მყოფი პირი დააკავა.

ფაქტთან დაკავშირებით, სახალხო დამცველი მოუწოდებს პროკურატურას, ჩაატაროს ყოვლისმომცველი, სრული და ობიექტური გამოძიება, ასევე, საგამოძიებო პროცესი წარმართოს სავარაუდო სიძულვილის მოტივის გამოკვეთის მიმართულებით.

სიძულვილით მოტივირებულ დანაშაულების პრევენციის მიზნით ქმედითი ზომების გატარების მოთხოვნით, გუშინ შსს-ს შენობასთან აქცია გაიმართა.