ტრანსგენდერი ქალის ცემის ფაქტის გასაპროტესტებლად და სიძულვილით მოტივირებულ დანაშაულების პრევენციის მიზნით ქმედითი ზომების გატარების მოთხოვნით, შსს-ს შენობასთან დღეს, 16 ოქტომბერს აქცია გაიმართა.

აქცია სიძულვილით მოტივირებულ დანაშაულების პრევენციის მიზნით ქმედითი ზომების გატარების მოთხოვნით. 16 ოქტომბერი, 2016.

ფოტო: On.ge / თორნიკე მანდარია

ქალთა უფლებადამცველმა, იურისტმა, ბაია პატარაიამ On.ge-ს უთხრა, რომ აღნიშნულ საქმეში პასუხისმგებლობა ნაწილობრივ სახელმწიფოსა და ხელისუფლებას ეკისრება:

ფოტო: თორნიკე მანდარია / On.ge

"ამ ყველაფერზე პასუხისმგებელი მათ შორის არის სახელმწიფოც. სახელისუფლებო და სხვა რამდენიმე პარტია წინასაარჩევნო პერიოდში ქადაგებდა, რომ საჭიროა კონსტიტუციაში ქორწინებასთან დაკავშირებული ცვლილების შეტანა. ეს კამპანია აღვივებს შიშს ლგბტ ადამიანების მიმართ. მაშინ, როცა ხელისუფლების ვალდებულებაა, ყოველდღე ესაუბრებოდეს ჩვენს საზოგადოებას და ეუბნებოდეს, რომ ლგბტ ადამიანები და საერთოდ გენდერული იდენტობა და სექსუალური ორიენტაცია საზოგადოებისთვის არანაირ საფრთხეს არ წარმოადგენს. არ ვიცი კვალიფიკაციის გამო, იმის გამო, რომ მათ არ ესმით რას ნიშნავს სიძულვილით ჩადენილი დანაშაული, თუ პოლიტიკური ნების გამო სხვადასხვა ტიპის დანაშაულს, მათ შორის ფემიციდსაც, არ აკვალიფიცირებს როგორც დისკრიმინაციული მოტივით ჩადენილ დანაშაულს. მოტივი კი ძალიან მნიშვნელოვანია. ის შეიძლება იყოს დამამძიმებელი გარემოება სანქციის შეფარდების დროს."

ორგანიზაცია ლგბტ საქართველოს დირექტორის ლევან ბერიანიძის თქმით, აქცია იმ მიზანს ემსახურება, რომ შეჩერდეს ლგბტ ადამიანებისადმი და განსაკუთრებით ტრანსგენდერი ქალებისადმი სიძულვილით მოტივირებული დანაშაული:

ფოტო: თორნიკე მანდარია/On.ge

"ჩვენ ვხედავთ, რომ უამრავი ტრანსგენდერი ქალი ხდება ძალადობის მსხვერპლი. რამდენიმე ტრანსგენდერი ადამიანი გახდა მკვლელობის მსხვერპლი. საბი ბერიანის საქმის მიმართ სასამართლო იყო არასენსიტიური. ეს იწვევს დაუსჯელობის სინდრომს და ჩვენ ვხედავთ კიდევ ერთ ტრანსგენდერ ადამიანს, რომელიც არის მკვლელობის მცდელობის მსხვერპლი."

რესპუბლიკური პარტიის წევრი და უფლებადამცველი თამარ კორძაია მიიჩნევს, რომ აქციაზე შეკრებილები სრულიად სამართლიანად ითხოვენ სიძულვილით მოტივირებული დანაშაულის კვალიფიკაციის მინიჭებას:

ფოტო: თორნიკე მანდარია / On.ge

"ჩვენ ყოველ დღე ვუყურებთ თუ როგორ შეიძლება ადამიანების მიმართ ხდებოდეს სიძულვილით მოტივირებული დანაშაული. რა თქმა უნდა, საბი ბერიანის მკვლელი დღეს არ უნდა იყოს იმ მდგომარეობაში როგორც არის. მის მიმართ უნდა დამდგარიყო ის კვალიფიკაცია, რასაც დღეს აქ შეკრებილი ადამიანები ითხოვენ. საბოლოოდ ვიღებთ იმ შედეგს, რომ ადამიანი იბრძვის სიცოცხლისთვის მხოლოდ იმიტომ, რომ ვიღაცას ის მიაჩნია არათანასწორად, მიაჩნია რომ ასეთი არ უნდა ცოცხლობდეს".