ლანჩხუთი-ჩოხატაურის მაჟორიტარ დეპუტატს, ნინო წილოსანს ადგილობრივები აქციით დახვდნენ. აქციის მონაწილეები ნინო წილოსანის გადაწყვეტილებას აპროტესტებდნენ, რომელმაც პროპორციულ საარჩევნო სისტემაზე გადასვლის კანონპროექტს მხარი არ დაუჭირა.

მათ წილოსანს უთხრეს, რომ მისი გადაწყვეტილებით იმედგაცრუებულები არიან.

"მე მეგონა, რომ თამარ ჩუგოშვილთან ერთად იქნებოდით და დღესაც არ მჯერა, რომ ნინო წილოსანმა ასეთი ბნელი გადაწყვეტილება მიიღო", — მიმართა ერთ-ერთმა ადგილობრივმა ნინო წილოსანს.

თავად წილოსანმა დღეს, 15 ნოემბერს განცხადება გაავრცელა. მისი თქმით, არ ეთანხმება მოსაზრებას, რომ საქართველოს განვითარების ამ ეტაპზე პროპორციული საარჩევნო სისტემა აუცილებლად სჯობს არსებულს. ის ამბობს, რომ პროპორციული სისტემა ევროპის ქვეყნებში ქმნის პოლიტიკურ კრიზისს.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. კანონპროექტის მისაღებად 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.