ჰოლანდიელ მხატვარზე, ვინსენტ ვან გოგზე შექმნილი ფილმის, გიყვარდეს ვინსენტი, პრემიერა 2017 წელს დიდ ბრიტანეთში გაიმართება, შემდეგ კი მისი ჩვენება მსოფლიოს სხვადასხვა ქალაქებში შედგება.

ფილმზე მუშაობა რეჟისორებმა დოროთ კობიელმა და ჰიუ უელშმანმა 2015 წელს დაიწყეს. სურათზე მსახიობების გარდა ასი მხატვარი მუშაობდა, რომლებიც შეეცადნენ ნახატები მაქსიმალურად მიეახლოებინათ რეალობასთან.

ფილმში მთავარ როლებს სირშა რონანი, ელინორ ტომლინსონი, ჰელენ მაკგრეგორი, დუგლას ბუტი, ეიდან ტერნერი და რობერტ გულაცზიკი ასრულებენ.

ვან გოგი საკუთარი სტილით XIX საუკუნის კრიტიკული რეალიზმისა და განსაკუთრებით ჟან ფრანსუა მილეს შემოქმედებით ტრადიციებს განაგრძობდა და ავითარებდა. ის 1888 წელს სამუშაოდ საფრანგეთის სამხრეთ პროვინციაში, არლიში გაემგზავრა სადაც ინტენსიურად და ნაყოფიერად მუშაობდა. არლის პერიოდის დასაწყისშივე ჩამოყალიბდა მისი მხატვრული ენა - საკუთარი ემოციური განწყობილებით გადმოეცა ნატურა, მოვლენა, თუ საგანი. მხატვარი მიმართავდა ფერების კონტრასტულ შეხამებას და პასტოზურ მონასმებს.

80-იანი წლების ბოლოს მხატვარი ფსიქიკურად დაავადდა, რასაც მოჰყვა კონფლიქტი მასთან სტუმრად ჩამოსულ გოგენთან. ვან გოგი იწვა ჯერ არლის, შემდეგ კი სენ-რემისა და ოვერ-სიურ-უაზის (სადაც თავი მოიკლა) საავადმყოფოში.

ვინსენტმა ფსიქიური აშლილობის დროს თვითდაზიანება მიიყენა და ყური მოიჭრა, რის შემდეგადაც მედიცინაში ახალი ტერმინი - ვან გოგის სინდრომი დამკვიდრდა, რომლის დროსაც ადამიანი მიმართავს თვითდაზიანებას - სხეულის ნაწილის მოკვეთას, ჭრილობის მიყენებას ან კატეგორიულად მოითხოვს ჩაუტარონ ქირურგიული ოპერაცია.