17 არასამთავრობო ორგანიზაცია პარლამენტის მიერ ჩაგდებულ საკანონმდებლო ინიციატივასთან დაკავშირებით ერთობლივ განცხადებას ავრცელებს და პასუხისმგებლობას ქართული ოცნების თავმჯდომარეს, ბიძინა ივანიშვილს აკისრებს.

მათი თქმით, დღეს ჩაგდებული ინიციატივა ქვეყნის დემოკრატიული განვითარებისათვის, შესაძლოა, საბედისწერო აღმოჩნდეს. ორგანიზაციები აღნიშნავენ, რომ პროპორციულ საარჩევნო სისტემაზე გადასვლა არ იყო მხოლოდ რომელიმე პოლიტიკოსის დაპირება ან საზოგადოების მცირე ჯგუფის ახირება, ის მთელი საზოგადოების მოთხოვნა იყო, რომელსაც მხარს უჭერს ფაქტობრივად ყველა პოლიტიკური პარტია და საზოგადოებრივი ჯგუფი.

"ამ გადაწყვეტილებაზე სრული პასუხისმგებლობა ეკისრება მმართველი პარტიის თავმჯდომარეს და ქვეყნის არაფორმალურ მმართველს, ბიძინა ივანიშვილს, რომელიც საკუთარი ძალაუფლების შესანარჩუნებლად და სახელმწიფოს მისატაცებლად, როგორც ჩანს, მზად არის უსამართლო საარჩევნო სისტემის გამოყენებით ამომრჩეველს წაართვას ქვეყნის მართვაში მონაწილეობის შესაძლებლობა და დაუმსახურებლად მიისაკუთროს საპარლამენტო მანდატები", — ნათქვამია განცხადებაში.

მათივე განცხადებით, ხელისუფლებისთვის ცხადი იყო, რომ მიღებული გადაწყვეტილება მასობრივ საზოგადოებრივ მღელვარებას გამოიწვევდა.

"გვაქვს საფუძველი ვივარაუდოთ, რომ ის ბოლო დღეებში თავად უწყობდა ხელს ამ მღელვარების წარმოშობას, რაც შესაძლოა განპირობებული ყოფილიყო ძველი საარჩევნო სისტემით ვადამდელი საპარლამენტო არჩევნების ჩატარებისა და ამ გზით ხელისუფლების შენარჩუნების სურვილით", — აღნიშნულია განცხადებაში.

არასამთავრობოები მოუწოდებენ ბიძინა ივანიშვილსა და ქართულ ოცნებას, გაიაზროს ის მძიმე პოლიტიკური კრიზისი, რომელშიც ქვეყანა შევიდა და მიიღოს ყველა პოლიტიკური ზომა მის დასაძლევად, რომლის ერთადერთ და უალტერნატივო გზად პარლამენტის მიერ სრულად პროპორციული საარჩევნო სისტემის დაუყოვნებლივ მიღება წარმოადგენს.

განცხადებას ხელს აწერენ:

  1. საქართველოს დემოკრატიული ინიციატივა (GDI);
  2. სამართლიანი არჩევნებისა და დემოკრატიის საერთაშორისო საზოგადოება (ISFED);
  3. დემოკრატიისა და უსაფრთხო განვითარების ინსტიტუტი (IDSD);
  4. საქართველოს ღია საზოგადოების ფონდი (OSGF);
  5. ადამიანის უფლებების სწავლებისა და მონიტორინგის ცენტრი (EMC);
  6. პარტნიორობა ადამიანის უფლებებისთვის (PHR);
  7. საერთაშორისო გამჭვირვალობა - საქართველო (TI Georgia);
  8. საქართველოს რეფორმების ასოციაცია (GRASS);
  9. საზოგადოება და ბანკები;
  10. საქართველოს ახალგაზრდა იურისტთა ასოციაცია (GYLA);
  11. ტოლერანტობის და მრავალფეროვნების ინსტიტუტი (TDI);
  12. ადამიანის უფლებათა ცენტრი (HRC);
  13. საქართველოს პოლიტიკის ინსტიტუტი (GIP);
  14. მსოფლიო გამოცდილება საქართველოსთვის;
  15. მმართველობითი სისტემების განვითარების ცენტრი;
  16. საქართველოს მედია-კლუბი;
  17. მედიის განვითარების ფონდი (MDF).