ქართული ოცნება — მრეწველების დეპუტატის სიმონ ნოზაძის თქმით, თუ პარლამენტში პროპორციული საარჩევო სისტემის პროექტი ჩავარდა, "არავის გაუკვირდეს, რომ მრეწველებიც იმ მიტინგზე დადგებიან". დეპუტატმა პროპორციული სისტემის მხარდასაჭერი აქცია იგულისხმა, რომელსაც მოძრაობა ქვეყნის სამსახურშია მართავს.

დღეს, 13 ნოემბერს ქართული ოცნების ოფისში უმრავლესობის სხდომა მიმდინარეობს. მათ პროპორციულ საარჩევნო სისტემაზე გადასვლა უნდა განიხილონ.

როგორც სიმონ ნოზაძე აცხადებს, მისთვის გასაგებია იმ დეპუტატების პოზიცია, რომლებიც პროპორციული არჩევნების წინააღმდეგი არიან, თუმცა მისთვის უმრავლესობის მერყეობაა მოულოდნელი.

"მე არც კი მიმაჩნია საჭიროდ დღევანდელი შეხვედრა. აბსოლუტური უმრავლესობის პოზიცია ნათელია, მე ამას მხარს ვუჭერ... ასე მგონია არ ჩავარდება, ოპოზიციური სპექტრი მხარს უჭერს და აბსოლუტური უმრავლესობა უმრავლესობისაც მხარს უჭერს და საკონსტიტუციო უმრავლესობას ავაგროვებთ", — განაცხადა ნოზაძემ.

პარლამენტს პროპორციული საარჩევნო სისტემისთვის პირველი მოსმენით კენჭი 12 ნოემბერს უნდა ეყარა, თუმცა კენჭისყრა გადაიდო. სავარაუდოდ კენჭისყრა დღეს გაიმართება.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: