აზერბაიჯანული მედიის ცნობით, ბაქო-თბილისი-ყარსის რკინიგზის მშენებლობა დასასრულს უახლოვდება.

აზერბაიჯანის რკინიგზის (ADY) თავჯდომარის, ჯავიდ გურბანოვის, განცხადებით, რკინიგზის მშენებლობა საქართველოსა და აზერბაიჯანის ტერიტორიებზე დასრულებულია:

"დარჩა თურქეთი, რომელმაც ყარსის რაიონში თითქმის დაასრულა გვირაბში გზის მშენებლობა. დარჩენილია 100-130 კილომეტრის გზის დაგება, რაც მალე შესრულდება, ასე რომ, შეგვიძლია ვთქვათ, რომ ბაქო-თბილისი-ლარსის რკინიგზის მშენებლობა თითქმის დასრულებულია. გეგმის მიხედვით, ახალ მაგისტრალზე პირველი მატარებელი წლის დასასრულამდე გაივლის".

ბაქო თბილისი ყარსის რკინიგზა ახალი დერეფანი იქნება, რომელიც აზერბაიჯანს, საქართველოსა და თურქეთს სარკინიგზო მაგისტრალით დააკავშირებს. პროექტი ასევე გახსნის ჩრდილო-სამხრეთ დერეფანს რუსეთიდან თურქეთის მიმართულებით.

ბაქო-თბილისი-ყარსის რკინიგზას შეუძლია მნიშვნელოვნად შეამციროს ტრანზიტის ხანგრძლივობა ევროპასა და ჩინეთს შორის.

ბაქო-თბილისი-ყარსის სარკინიგზო მაგისტრალის მშენებლობას საფუძველი აზერბაიჯანის პრეზიდენტის ილჰამ ალიევის ინიციატივით ჩაეყარა. პროექტის განხორციელება კი საქართველომ, აზერბაიჯანმა და თურქეთმა 2007 წელს დაიწყეს.