მეუფე ზოსიმეს მხრიდან სავარაუდო სექსუალური ძალადობის მსხვერპლი, სასულიერო აკადემიის ყოფილი სტუდენტი, კახა კალაძე ამბობს, რომ არ უნდა, სხვებმა ბინძურ თამაშებში გამოიყენონ. მან წერილი ტელეკომპანია ფორმულას გაუგზავნა.

მისი თქმით, 31 წლის წინანდელი მოვლენები საჯარო სივრცეში მასთან შეუთანხმებლად გაჟღერდა. მისივე თქმით, კონკრეტული ფაქტის შეფასება მაშინდელი საზოგადოებრივ-პოლიტიკური ცხოვრების კონტექსტიდან ამოგლეჯილად შეუძლებელია.

"შექმნილი მაღალი ემოციური ფონის გათვალისწინებით, სარწმუნოების, ეკლესიისა და ეროვნული ღირებულებების დისკრედიტაციის გლობალური პროექტის პირობებში ჩემგან ნებისმიერი ფორმის პასუხი და მაშინდელ მოვლენებში მონაწილე პირთა როლის გამომზეურება (სამწუხაროდ, ზოგი მათგანი გარდაცვლილია) მეც ამ პროექტის მონაწილედ მაქცევს. არ მინდა გამოყენებული ვიქნე სხვების ბინძურ თამაშებში, მით უმეტეს, რომ დიდი ხანია ვადევნებ თვალს საქართველოში მიმდინარე არაჯანსაღ პროცესებს და ზედმიწევნით ვიცი რაც ხდება საერო თუ სასულიერო ცხოვრებაში... მაშინდელ პროცესებში გარკვევა და საბოლოო სამართლიანი შედეგის დადგომა კი ობიექტურ, მიუკერძოებელ გარემოს საჭიროებს... ვიმედოვნებ, მალე ვეღირსებით ასეთ გარემოს", — წერს ის.

1988 წლის 23 დეკემბერს მომხდარი სავარაუდო სექსუალური ძალადობის შესახებ მამა გიორგიმ ფეისბუქზე გუშინ, 5 ნოემბერს დაწერა. მან დაასახელა კონკრეტული პირის სახელი და გვარიც, რომელზეც ამბობდა, რომ თბილისის სასულიერო სემინარიაში მაშინდელი რექტორი, ეპისკოპოსი ზოსიმე შიოშვილი "სოდომურად თავს დაესხა" სვეტიცხოვლის რეზიდენციაში. მეუფე ზოსიმემ ბრალდება უარყო და თქვა, რომ ის სექსუალურ ძალადობაში იმიტომ დაადანაშაულეს, რომ პატრიარქს ებრძვიან.

ამავე თემაზე: