ახალქალაქისა და კუმუდოს მიტროპოლიტის, მეუფე ნიკოლოზ ფაჩუაშვილის თქმით იძულებულები გახდნენ, რომ მეუფე პეტრე სინოდის სხდომიდან ხელით გაეყვანათ. ამის შესახებ მან სინოდის სხდომის დასრულების შემდეგ ჟურნალისტებს უთხრა და აღნიშნა, რომ სინოდს არ უნდოდა "მძიმე გადაწყვეტილების მიღება".

"უხამსობა, უხამსი სიტყვებით, უხამსობა ილაპარაკა. ეს არ იყო გაღიზიანება, ჩვენ წმინდა სინოდი კი არ მოგვიხსენია, არამედ ის მოიქცა უხამსად. მე, რა თქმა უნდა, არ დავაზუსტებ, წმინდა სინოდზე მომხდარი ამბებია, რომლიც ყოველთვის შიგნით უნდა დარჩეს. ფაქტია, რომ ის მოიქცა ისეთნაირად, რომ... შეურაცხყოფის მიყენება საერთოდ ადამიანისთვის, მით უმეტეს სასულიერო პირისთვის, მით უმეტეს პატრიარქისთვის, ეს არ არის არც მხილების ფორმა და არც, საერთოდ, არანაირად გამართლებული საქციელი. ჩვენ ვცდილობდით, ეს აგვეხსნა", — თქვა მიტროპოლიტმა ნიკოლოზმა.

მეუფეს თქმით, პეტრე ცაავას განცხადება, რომ პატრიარქი "მამათმავლობისა და პიდარასტიის ცოდვითაა შეპყრობილი" ცილისწამებაა. მისივე განმარტებით, მხილებას წინ უნდა უძღოდეს არგუმენტები, ხოლო ცილისწამებაა, როცა რაღაცას ამბობ და საზოგადოებას შემდეგ პირდები არგუმენტებს.

მეუფე პეტრემ სინოდის სხდომის შემდეგ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით მან არგუმენტების წარმოსაგდენად დრო ითხოვა და განმარტა, რომ სიტყვა "პიდარასტიაში", რომლითაც პატრიარქი დაახასიათა, "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.