ე.წ. კაბელების საქმის პროკურორი, ნინო აღლემაშვილი ამბობს, რომ საქმეზე ბრალდებულების ახლობლების საუბარი იმასთან დაკავშირებით, რომ საქმეს პოლიტიკური სარჩული აქვს უბრალოდ დანაშაულის გამართლებაა:

"როგორც თქვენთვის ცნობილია, დაცვის მხარეს წარმოდგენილი აქვს სააპელაციო საჩივარი. რა თქმა უნდა, ჩვენი პოზიცია არის უცვლელი, ჩვენ ვფიქრობთ, რომ განაჩენი, რომელიც გამოიტანა პირველმა ინსტანციამ დარჩება ძალაში ყველა ინსტანციაში. ადვოკატები ცდილობენ, ასეთი [საუბარი, რომ საქმე პოლიტიკური სარჩული აქვს] არადამაჯერებელი არგუმენტებით უბრალოდ გაამართლონ ის დანაშაული, რომელიც ამ ადამიანებმა ჩაიდინეს. ამიტომ ამ საქმისთვის მთავარი არის ბრალდებულების ქმედება და მათი დანაშაული, ეს არის ფაქტი, რომელიც არის სახეზე და დადასტურებულია მტკიცებულებებით".

დღეს ე.წ. კაბელების საქმის სააპელაციო სარჩელის განხილვა თბილისის სააპელაციო სასამართლოში განახლდა.

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

უფრო მეტი იხილეთ აქ:

კაბელების საქმე: დეტალები მოკლედ