"ეს არის სიკეთისა და ბოროტების დაპირისპირება" — მთავრობის სხვა წევრებთან ერთად ბერა ივანიშვილის ქველმოქმედებასთან დაკავშირებით გამოთქმულ კრიტიკას ირაკლი ღარიბაშვილიც გამოეხმაურა. ამის შესახებ მან იმედის ეთერში ისაუბრა. თავდაცვის მინისტრის განცხადებით, ბიძინა ივანიშვილი და მისი ოჯახი 25 წლის განმავლობაში უპრეცედენტო მასშტაბის ქველმოქმედებას ეწევა:

"მინდა, კიდევ ერთხელ შევახსენო საზოგადოებას, რომ სწორედ ბატონი ივანიშვილი და მისი ოჯახი, 25 წლის განმავლობაში, ჩვენი ქვეყნისთვის უპრეცედენტო მასშტაბის ქველმოქმედებას ეწევა. დღეს საქმე გვაქვს ორი მთავარი საკითხის დაპირისპირებასთან, ეს არის სიკეთისა და ბოროტების დაპირისპირება. როდესაც ადამიანი კითხვის ნიშნის ქვეშ აყენებს ისეთ კეთილშობილურ საქმიანობას, როგორც არის ქველმოქმედება და ისეთი საქმეს, რომელიც კონკრეტულ ციფრებში აისახა და ჩვენი ქვეყნის მოსახლეობისთვის 3 მილიარდი დოლარის ქველმოქმედებას მოიცავს, რა თქმა უნდა, აქ სერიოზული კომენტარის გაკეთება ძალიან გამიჭირდება".

ამაზონის ჯუნგლებისთვის 1,1 მილიონი აშშ დოლარის გადარიცხვისთვის ბერა ივანიშვილი შეაქეს უმრავლესობის დეპუტატებმა, მათ შორის, სოფო კილაძემ და აკაკი ზოიძემ. მანამდე პრემიერ-მინისტრრმა გიორგი გახარიამ საზოგადოების ის ნაწილი გააკრიტიკა, ვინც უარყოფითად შეხვდა ბერას ქველმოქმედების აქტს. მან "მიუღებელი" და "უსამართლო" უწოდა იმ დისკუსიას, რაც ამ თემის ირგვლივ წამოიჭა, ამასთან, პრემიერმა ბიძინა ივანიშვილის მიერ საქართველოში განხორციელებულ პროექტებს გაუსვა ხაზი.

ამავე თემაზე: