reuters-ის ინფორმაციით, მას შემდეგ, რაც გერმანიაში Snickers-ის ბატონში პლასტმასის ნაწილები იპოვნეს, Mars Inc-მა თავისი პროდუქტი 55 ქვეყნიდან უკან გაითხოვა. აღნიშნული ქვეყნების სიაში საქართველო მხოლოდ იმიტომ არ მოხვდა, რომ ჩვენთან რუსეთში წარმოებული მარსის პროდუქტი შემოდის.

საქართველოში კომპანია მარსის ოფიციალური დისტრიბუტორის “მასტერ თრეიდის” ბიზნესის განვითარების მენეჯერის ვატო ვაჭარაძის თქმით, საქართველოდან კომპანია მარსი პროდუქტის უკან გათხოვას არ აპირებს. მისი თქმით, აღნიშნული მხოლოდ ჰოლანდიაში წარმოებულ შოკოლადს შეეხო.

“ჩვენთან მას არანაირი შეხება არ აქვს, რადგან საქართველოში შემოსული პროდუქტი რუსეთშია წარმოებული”, - განაცხადა ვაჭარაძემ.

reuters-ის ცნობით, კომპანია მარსის ოფიციალურმა წარმომადგენლმა განაცხადა, რომ შოკოლადების პარტია, რომელიც უკან გაითხოვეს, ევროპის ქვეყნებსა და რამდენიმე აზიის ქვეყანაში იყიდებოდა. მათ შორის არის გერმანია, საფრანგეთი და დიდი ბრიტანეთიც.

“დარწმუნებულები ვერ ვიქნებით, რომ პლასტმასის ნაწილაკები მხოლოდ ერთ კონკრეტულ შოკოლადში იყო. ჩვენ არ გვინდა არსებობდეს ჩვენ მიერ წარმოებული პროდუქტი, რომელიც ჩვენი ხარისხის სტრანდარტებს არ შეესაბამება. სწორედ ამიტომ, აღნიშნული პარტიის უკან გათხოვა გადავწყვიტეთ”, - განაცხადა მარსის ნიდერლანდების წარმომადგენელმა.

მარსი ტკბილეულის მწარმოებელი ერთ-ერთი უმსხვილესი კომპანიაა, რომელიც 29 დასახელების შოკოლადს მსოფლიოს სხვადასხვა ქვეყანაში ყიდის. მის მიერ არის წარმოებული M&M’s, Twix და Bounty. ამავე კომპანიის პროდუქტია საღეჭი რეზინი Wrigley და ძაღლის საკვები Pedigree. ამ დროისთვის უცნობია, რა ოდენობის ზარალს ნახავს კომპანია მას შემდეგ, რაც აღნიშნულ პარტიას უკან გაითხოვს.