თანამედროვე სამყაროში ინფორმაციის მოძიება პრობლემას აღარ წარმოადგენს, რასაც ვერ ვიტყოდით ინფორმაციის უზარმაზარ ნაკადში ორიენტირებაზე. ფაქტისა და მოსაზრების გამიჯვნა, რეალური და გამოგონილი ამბების გარჩევა ჩვენი დროის ერთ-ერთ ყველაზე დიდ გამოწვევად იქცა. ამ გამოწვევამ კი გააჩინა გარკვეული ცოდნით "შეიარაღების" აუცილებლობა. ამ ცოდნას მედიაწიგნიერება ჰქვია.

"სოციალურმა მედიამ წაშალა ზღვარი ტრადიციულ ჟურნალისტიკასა და ახალ ჟურნალისტიკას შორის, დღეს, პრაქტიკულად, ყველა არის ჟურნალისტი. აქედან გამომდინარე, აუცილებელია, ყველამ გააცნობიეროს ის პასუხისმგებლობა, რომელიც შეიძლება არასანდო, ყალბი ინფორმაციის გავრცელებას უკავშირდებოდეს. ასეთი შინაარსის მასალების აკრძალვის ალტერნატივა არის მედიის მომხმარებლების მომზადება, როგორ გაფილტრონ ყალბი ინფორმაცია, რომელიც აღვივებს შუღლს ადამიანებში და შეიძლება გამოიწვიოს კონფლიქტებიც კი, როგორც ვნახეთ ევროპის სხვადასხვა ქვეყანაში ან პოსტსაბჭოთა სივრცეში", - ამბობს მედიის განვითარების ფონდის ხელმძღვანელი თამარ კინწურაშვილი.

მედიაწიგნიერება ახალგაზრდებს ეხმარება, გახდნენ მედიის აქტიური, ჩართული მომხმარებლები.

მედიის განვითარების ფონდი MDF უკვე წლებია, მედიაწიგნიერების ამაღლებაზე მუშაობს: ტრენინგები საქართველოს მასშტაბით, გრძელვადიანი სასწავლო კურსი თბილისში და სასწავლო თუ პროფესიული ლიტერატურის შექმნა - ეს ორგანიზაციის საქმიანობის არასრული ჩამონათვალია.

ახლა კი იმ ახალგაზრდების წახალისების დროც მოვიდა, რომლებმაც უკვე გაიღრმავეს ყალბი ამბების აღმოჩენის უნარები. წელს MDF და ფაქტების გადამოწმების პორტალი მითების დეტექტორი 2019 წლის "ყველაზე მედიაწიგნიერ ახალგაზრდას" ქვიზების კონურსის გზით გამოავლენენ.

"ეს კონკურსი იქნება ერთგვარი სტიმული, რომ ახალგაზრდები ჩაერთონ და გამოსაცდონ თავისი შესაძლებლობები ამ თვალსაზრისით. ქვიზები მეტ მოტივაციას აძლევს ადამიანს და დამოუკიდებლად შეუძლიათ შეამოწმონ თავისი თავი და ასე ფართო აუდიტორიაზე შეგვიძლია გასვლა", - აცხადებს On.ge-სთან საუბარში თამარ კინწურაშვილი.

როგორ შეგიძლია გახდე 2019 წლის ყველაზე მედიაწიგნიერი ახალგაზრდა?

• პირველ რიგში, დარწმუნდი, რომ შენი ასაკი 17-დან 28 წლამდეა;
• 27 ოქტომბრამდე დარეგისტრირდი ქვიზების კონკურსზე შემდეგ მისამართზე: millab.ge
• 27 ოქტომბერს, 12 საათზე მონაწილეობა მიიღე ქვიზების კონკურსში, რომელიც დისტანციურად, ონლაინ გაიმართება;
• უპასუხე შეკითხვებს და დაელოდე შედეგების გამოცხადებას.

კონკურსი საუკეთესო შედეგის მქონე 3 გამარჯვებულს გამოავლენს:

• 2019 წლის ყველაზე მედიაწიგნიერი ახალგაზრდა ახალგაზრდა ანაზღაურებად, ერთთვიან სტაჟირებას მითების დეტექტორის რედაქციაში გაივლის;
• მე-2 ადგილზე გასული კი - On.ge-ს რედაქციაში.
• მე-3 ადგილზე გასული ForSet-ისგან DataFest-ის ბილეთს მიიღებს საჩუქრად.

საუკეთესო შედეგის მქონე სამივე ახალგაზრდას საჩუქრად ციფრული ტექნიკა და სერტიფიკატები გადაეცემათ.

2019 წლის ყველაზე მედიაწიგნიერი ახალგაზრდის დასახელება და გამარჯვებულთა დაჯილდოება ნოემბერში სპეციალურ საზეიმო ცერემონიალზე მოხდება, რომელზეც MDF-სა და ForSet-ის ერთობლივი ახალი ონლაინ თამაშის პრეზენტაციაც გაიმართება.

კონკურსი საქართველოში ამერიკის საელჩოს მხარდაჭერით და ილიას უნივერსიტეტთან პარტნიორობით იმართება. კონკურსის პროგრამულ მხარდაჭერას ForSet-ი, ხოლო საინფორმაციოს - On.ge უზრუნველყოფენ.